কৰিমগঞ্জ, 17 জুনঃ পাথাৰকান্দি সমষ্টিত প্ৰধানমন্ত্ৰী গ্ৰম্য পকী পথ যোজনাৰ অধিনত নিৰ্মীয়মান এটা পথত ব্যাপক খেলিমেলিৰ অভিযোগ উত্থাপন কৰিছে স্থানীয় জনতাই । কাম সম্পূৰ্ণ কৰাৰ নিৰ্ধাৰিত সময় উকলি যোৱাৰ পিছতো পঞ্চাশ শতাংশও কাম সম্পন্ন হৈ নুঠাৰ বাবে ক্ষোভ উজাৰিছে স্থানীয় লোকে । ইপিনে এতিয়াইলৈ সম্পূৰ্ণ হোৱা কামৰ ক্ষেত্ৰতো মুঠেও সন্তুষ্ট নহয় অঞ্চলটোৰ ৰাইজ । কিয়নো নিম্নমানৰ কাম হোৱাৰ বাবে পথটোৰ বিভিন্ন অংশ বৰষুণৰ পানীয়ে খহায় নিয়া দেখা গৈছে ।
পাথাৰকান্দি সমষ্টিৰ অন্তৰ্গত লোৱাইৰপোৱাৰ পৰা পেচাৰঘাটলৈকে পথটো নিৰ্মাণৰ বাবে 2018 চনত চাৰি কোটি পয়ত্ৰিশ লাখ টকা ধাৰ্য কৰা হৈছিল আৰু পথ নিৰ্মাণৰ কাম আৰম্ভও হৈছিল । জনৈক মদনমোহন দাস নামৰ ঠিকাদাৰ এজনে এই পথটোৰ নিৰ্মাণৰ নিবিদা লাভ কৰিছিল ।
ৰাইজৰ অভিযোগ মতে প্ৰথম অবস্থাত পথ নিৰ্মাণৰ কাম দ্ৰুতগতিত চলিছিল যদিও সময় যিমান অতিবাহিত হৈছিল কামৰ মানদণ্ডও নিম্নমানৰ হ'ব ধৰিছিল । আনকি এইবাৰৰ বৰষুণে পথৰ বহু অংশৰ মাটি কাষৰ পথাৰলৈ উটুৱাই লৈ যায় । পথৰ বহু অংশত কালভাৰ্ট নিৰ্মানৰ কথা আছিল যদিও আজিলৈকে সেয়াও সম্পন্ন হৈ নুঠিল ।
বিভাগীয় একাংশ আমোলা আৰু ঠিকাদাৰৰ মিতিৰালিৰে কৰিমগঞ্জৰ ভালে সংখ্যক প্ৰধানমন্ত্ৰী গ্ৰাম্য পকী পথ যোজনাৰ কামত ইতিমধ্যে বিসংগতি ধৰা পৰিছে । এই পথটোৰ ক্ষেত্ৰতো একে অভিযোগ উত্থাপন কৰিছে স্থানীয় ৰাইজে । ইতিমধ্যে বিষয়টো কৰিমগঞ্জৰ জিলাধিপতি আৰু সমষ্টিৰ বিধায়ক কৃষ্ণেন্দু পাল'কো অবগত কৰিছে এলেকাৰ লোকসকলে।
লগতে চাওকঃ বাঘজানৰ তৈল কুণ্ডত বেইলী ব্ৰীজ নিৰ্মাণক লৈ সমীক্ষা আৰম্ভ ভাৰতীয় সেনাৰ