কৰিমগঞ্জ , 10 জুলাই : এগৰাকী কাৰাবন্দী ৰহিঙীয়া মহিলাই জন্ম দিয়া এটা সন্তানক লৈ বিতৰ্কৰ সৃষ্টি হৈছে ভাৰত বাংলাদেশ সীমান্তৱৰ্তী(Indo-Bangladesh border) কৰিমগঞ্জ জিলাত ৷ সাংবিধানিক নিয়ম অনুসৰি, ভাৰতত জন্মগ্ৰহণ কৰা ব্যক্তিৰহে ভাৰতবৰ্ষৰ নাগৰিকত্ব লাভ কৰাৰ অধিকাৰ আছে ৷ এনেক্ষেত্ৰত ভাৰতত জন্মগ্ৰহণ কৰা কাৰাবন্দী প্ৰসুতি(jailed mother)গৰাকীৰ সন্তানটোৱেও ভাৰতীয় নাগৰিকত্ব(Indian Citizenship) লাভ কৰিব নেকি বুলি সৰ্বসাধাৰণ ৰাইজৰ মাজত চৰ্চা চলা পৰিলক্ষিত হৈছে ৷
উল্লেখযোগ্য যে, ম্যানমাৰৰ পৰা পীড়িত হোৱা ৰহিঙীয়া সকলৰ মাজৰ এগৰাকী মহিলা ৰচিদা বেগমে দীৰ্ঘদিন ধৰি বাংলাদেশৰ কক্স বাজাৰৰ ৰহিঙীয়া কেম্পত আশ্ৰয় লৈ আছিল ৷ পৰৱৰ্তী সময়ত কক্সবাজাৰৰ পৰা ত্ৰিপুৰা হৈ মহিলাগৰাকীয়ে ভাৰতত প্ৰৱেশ কৰিছিল ৷ ত্ৰিপুৰাৰ পৰা অসমৰ কৰিমগঞ্জত প্ৰৱেশ কৰাৰ সময়তে মহিলাগৰাকী অসম আৰক্ষীৰ হাতত ধৰা পৰিছিল ৷ আৰক্ষীৰ হাতত ধৰা পৰাৰ সময়ত ইতিমধ্যেই তিনিটাকৈ সন্তানৰ মাতৃ আছিল ৰচিদা বেগম ৷
বিগত ছয় মাহ দিন ধৰি কৰিমগঞ্জৰ জিলা কাৰাগাৰ(district jail Karimganj)ত কাৰাবন্দী হৈ আছিল ৰচিদা ৷ কাৰাবান্দী হৈ থকা অৱস্থাতেই অৰ্থাৎ, বৃহস্পতিবাৰে তেওঁ এটি কন্যা সন্তানৰ জন্ম দিয়ে ৷ জিলা কাৰাগাৰৰ অধীক্ষকগৰাকীয়ে জনোৱা অনুসৰি, সন্তানটো জন্ম দিয়াৰ পূৰ্বে মহিলাগৰাকীক কাৰাগাৰৰ ঠিকনা দি জিলাখনৰ এখন চিকিৎসালয়ত ভৰ্তি কৰোৱা হৈছিল ৷
এতিয়া সম্পূৰ্ণ ভাৰতীয় আইন অনুসৰি ভাৰতত জন্ম হোৱা শিশুটো অনাগত সময়ত ভাৰতীয় নাগৰিক হিচাপে বিবেচিত হ’ব নেকি বুলি বিষয়টোক লৈ সৰৱ চৰ্চা চলিছে জিলাখনত ৷ উল্লেখযোগ্য যে, ভাৰতীয় সংবিধান অনুসৰি 2004 চনৰ 3 ডিচেম্বৰৰ পিছত ভাৰতত জন্মগ্ৰহণ কৰা সকলো ব্যক্তিয়েই ভাৰতীয় নাগৰিক হিচাপে বিবেচিত হ’ব যদিহে ব্যক্তিগৰাকীৰ পিতৃ মাতৃ ভাৰতীয় নাগৰিক অথবা পিতৃ মাতৃৰ কোনোবা এগৰাকী বৈধ ভাৰতীয় নাগৰিক হয় ৷
লগতে পঢ়ক : চৈইফ-কৰীণাৰ দ্বিতীয় সন্তানৰ নাম ৰাজহুৱা
