কৰিমগঞ্জ , 22 আগষ্টঃ চৰকাৰ যি দলৰেই নহওক কিয় কৰিমগঞ্জ জিলা সদায়ই যেন চৰম অৱহেলিত৷ কৰিমগঞ্জৰ পোৱামাৰাৰ পৰা চূড়াইবাৰী অসম ত্ৰিপুৰা সংযোগী ৰাষ্ট্ৰীয় ঘাইপথটোৰ এতিয়া জৰাজীৰ্ণ অৱস্থা৷ মেৰামতিৰ অভাৱত ৰাষ্ট্ৰীয় ঘাইপথটোত সৃষ্টি হৈছে পুখুৰী সদৃশ পৰিস্থিতিৰ ৷
জিলাখনৰ পাথাৰকান্দি বিধানসভা সমষ্টিৰ অসম ত্ৰিপুৰা সংযোগী 8 নং ৰাষ্ট্ৰীয় ঘাইপথটোৰ বাবে সাধাৰণ ৰাইজে যমৰ যাতনা ভূগিব লগীয়া হৈছে৷ ৰাইজৰ অভিযোগ অনুসৰি বৰাক উপত্যকাখন চৰকাৰৰ কাষত অৱহেলিত হৈ আহিছে যদিও তাতোকৈ বেছি অৱহেলিত কৰিমগঞ্জ জিলা৷ আৰু উক্ত পথটোৱে ইয়াৰ বাস্তৱ উদাহৰণ ৷ জানিব পৰা মতে লোকসভা নিৰ্বাচনৰ পূৰ্বে গড়কাপ্তানি মন্ত্ৰী হিমন্ত বিশ্ব শৰ্মাই এই পথটো সংস্কাৰৰ বাবে দহ কোটিৰ আৱন্টন দিছিল ৷ কিন্তু এই পথ সংস্কাৰত বৃহৎ কেলেংকাৰী হৈছে বুলি ৰাইজে অভিযোগ কৰিছে৷ ৰাইজৰ অভিযোগ অনুসৰি পথটোৰ এনে দুৰ্দশাৰ ফলত প্ৰতিদিনে এই পথত সৰু-বৰ দুৰ্ঘটনা সংঘটিত হৈ আহিছে৷ আনহাতে এই পথটোকলৈ মন্তব্য আগবঢ়াইছে বিজেপিৰ বিধায়ক কৃষ্ণেন্দু পালে৷ দিল্লীয়ে অসমৰ উন্নয়ন নিবিচাৰে নেকি বুলি প্ৰশ্ন কৰাৰ লগতে পালে অভিযোগ কৰে যে দিল্লীৰ এচাম আধিকাৰীয়ে মুখ্যমন্ত্ৰী আৰু গড়কাপ্তানি মন্ত্ৰীৰ পত্ৰক কেৰেপকে নকৰে ৷
