কৰিমগঞ্জ, 27 অক্টোবৰ : পাথাৰকান্দিৰ বুৰুংগা জিপিত সংঘটিত এক ঘটনাক কেন্দ্ৰ কৰি উত্তেজনাৰ সৃষ্টি হৈছে ৷ বিজেপিৰ বুথৰ সভাপতি আব্দুল ছাত্তাৰৰ পচি যোৱা মৃতদেহ নিৰুদ্দেশ হোৱাৰ পাঁচ দিনৰ পাচত লংগাই নদীত উদ্ধাৰ হৈছে ৷ প্ৰত্যক্ষদৰ্শীয়ে জনোৱা মতে, মৃতদেহটোৰ মূৰত গুৰুতৰভাৱে আঘাতৰ চিন দেখা গৈছে । বুৰুংগা জিপিৰ প্ৰাক্তন পঞ্চায়ত সদস্য তথা ৱাৰ্ড নং ৱাৰ্ডৰ প্ৰতিনিধি আব্দুল ছাত্তাৰৰ মৃতদেহটো লংগাই নদীৰ পইলামুলি অঞ্চলৰ সমীপৱৰ্তী ধ্বংসাৱশেষত ওপঙি থকা অৱস্থাত উদ্ধাৰ কৰা হৈছে ৷
অচিনাক্ত দুষ্কৃতিকাৰীয়ে মৃতদেহটো নদীত পেলাই দিয়াৰ সন্দেহ কৰা হৈছে । ঘটনা সন্দৰ্ভত তথ্য লাভ কৰাৰ পিচত পথাৰকান্দি আৰক্ষীয়ে সেই স্থানত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে । পৰিয়ালৰ সূত্ৰৰ পৰা জানিব পৰা মতে, যোৱা সোমবাৰে প্ৰায় আঠ বজাত ঘৰৰ পৰা একাংশ চিনাকি ব্যক্তিয়ে তেওঁক মাতি অনাৰ পৰাই নিৰুদ্দেশ হৈ আছিল প্ৰাক্তন পঞ্চায়ত সদস্য তথা বৰ্তমানৰ পঞ্চায়ত সদস্যৰ প্ৰতিনিধি তথা বিজেপিৰ বুথৰ সভাপতি ৪৭ বছৰীয়া আব্দুল ছাত্তাৰ ৷
ঘৰৰ পৰা ওলাই যোৱাৰ পিচত গোটেই ৰাতি তেওঁৰ মোবাইল ফোনত যোগাযোগ কৰিব পৰা নগ’ল । নিশাৰ পৰাই পৰিয়ালৰ লোকে বিচাৰি আছিল যদিও কোনো খবৰ পোৱা নগ’ল । পাঁচ দিন ধৰি নিৰুদ্দেশ হৈ থকাৰ পিচত দুৰ্ভগীয়া আব্দুল ছাত্তাৰৰ মৃতদেহ তেওঁৰ ঘৰৰ সমীপতে লংগাই নদীত ওপঙি থকা অৱস্থাত উদ্ধাৰ হয় । ঘটনাৰ খবৰ বিয়পি পৰাৰ লগে লগে উক্ত অঞ্চলৰ ৰাইজ স্তম্ভিত হৈ পৰে । লংগাই নদীৰ পাৰত বহু লোকৰ সমাগম ঘটে । পাথাৰকান্দি আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে অসামৰিক চিকিৎসালয়ৰ মৰ্গলৈ স্থানান্তৰিত কৰি ঘটনাৰ তদন্ত আৰম্ভ কৰিছে ।
লগতে পঢ়ক : Lovestory: স্বামী-পুত্ৰ এৰি এখন দেশৰ পৰা আন এখন দেশৰ প্ৰেমিকৰ ওচৰলৈ
