কৰিমগঞ্জ, 27 এপ্ৰিল : দেশ জুৰি কৰ’ণা মহামাৰীয়ে ভয়ংকৰ ৰূপ ধাৰণ কৰিছে । বিশ্বৰ ভিতৰতে ভাৰতে ক’ভিড পজিটিভ ৰোগীৰ ক্ষেত্ৰত অভিলেখ সৃষ্টি কৰিছে । তেনে সময়তে একাংশৰ কাণ্ডজ্ঞানহীনতাই আচৰিত কৰিছে সভ্য সমাজক । দেশৰ বহু প্ৰান্তত কৰ’ণা অতিমাৰিৰ ফলত লক ডাউন দিয়াৰ পৰিস্থিতিৰ সৃষ্টি হৈছে । তেনে সময়ত একাংশই ক’ভিড প্ৰট‘কল ভংগ কৰি সমাজলৈ বিপদ মাতি আনিছে ৷
তেনে এক ঘটনা সংঘটিত হৈছে ত্ৰিপুৰাৰ ৰাজধানী চহৰ আগৰতলাত ৷ আগৰতলাত নৈশ সান্ধ্য আইন চলি থকাৰ মাজতে সোমবাৰে দুটাকৈ বিবাহ ভৱনত অবৈধ ভাৱে সান্ধ্যআইন উলংঘা কৰি বিয়াৰ অনুষ্ঠান চলাই থকা হৈছিল ৷ ক’ভিড প্ৰট’কল ভংগ কৰি অনুষ্ঠান চলোৱাৰ অভিযোগ লাভ কৰি সোমবাৰ নিশা ৰাজধানী আগৰতলাৰ পশ্চিম জিলাৰ উপায়ুক্ত শৈলেশ যাদৱৰ নেতৃত্বত ভৱন দুটাত অভিযান চলায় ৷
অভিযানত গোলাপ বাগান আৰু মানিক্য কোৰ্ট নামৰ দুই বিবাহ ভৱনে ক’ভিড বিধি উলংঘা কৰাৰ অপৰাধত জিলা উপায়ুক্ত শৈলেশ যাদৱে দুয়োটা বিবাহ ভৱন এবছৰৰ বাবে চীল কৰি দিয়ে ৷ এই ঘটনাই সমগ্ৰ ত্ৰিপুৰাতে চৰ্চা লাভ কৰিছে ৷
