কৰিমগঞ্জ, ৫ মে': ত্ৰিপুৰাত বৃদ্ধি পালে কৰ'ণা আক্ৰান্ত ৰোগীৰ সংখ্যা । তিনিদিনত ২৭ জন জোৱানৰ দেহত ধৰা পৰিল COVID-১৯ ৰ অৱস্থিতি । সোমবাৰৰ নিশা ১৩ জন জোৱানৰ দেহত কৰ'ণাৰ অৱস্থিতি ধৰা পৰাৰ তথ্য সদৰি কৰিলে মুখ্যমন্ত্ৰী বিপ্লৱ দেৱে ।
বৰ্তমান ত্ৰিপুৰাত কৰ'ণা আক্ৰান্তৰ ৰোগীৰ সংখ্যা বৃদ্ধি পাই হৈছে ২৯ জনলৈ । ইয়াৰে পূৰ্বে আক্ৰান্ত হোৱা দুজন ব্যক্তি সুস্থ হৈ নিজ ঘৰলৈ উভতি যাবলৈ সক্ষম হৈছিল । এই ঘটনাৰ পাচতেই ১০২ জন জোৱানৰ তেজৰ নমুনা সংগ্ৰহ কৰা হৈছে । এতিয়ালৈকে ১৩৮ নং বিএছএফ ইউনিটৰ ২৭ জন জোৱানৰ কৰ'ণা পজিটিভ পোৱা গৈছে ।
প্ৰথমে আক্ৰান্ত হোৱা জোৱান দুজনক আগৰতলাৰ জিবি হাস্পতালত চিকিৎসা প্ৰদান কৰি থকা হৈছে । বাকি নতুনকৈ আক্ৰান্ত হোৱা ২৫ জন জোৱানক আছুতীয়াকৈ ৰখা হৈছে কেম্পৰ ভিতৰতে ।
উল্লেখ্য যে, জোৱান সকলৰ মাজত আৰু COVID- ১৯ পজিটিভ পোৱাৰ আশংকা কৰা হৈছে । ৰাজ্যবাসীক আতংকিত নহ'বলৈ আহ্বান জনাইছে মুখ্যমন্ত্ৰী বিপ্লৱ কুমাৰ দেৱে ।
