পাথাৰকান্দি, 25 মাৰ্চ: কেইবাগৰাকী বিজেপি কৰ্মীক আৰক্ষীয়ে আটক কৰাৰ ঘটনাক কেন্দ্ৰ কৰি বুধবাৰে কৰিমগঞ্জৰ বাজাৰিছড়া আৰক্ষী থানাত এক উত্তপ্ত পৰিস্থিতিৰ উদ্ভৱ হয় ৷ সতীৰ্থ কৰ্মীসকলৰ মুক্তিৰ দাবীত পাথাৰকান্দি সমষ্টিৰ সহস্ৰাধিক বিজেপি কৰ্মীয়ে বাজাড়িছড়া থানা ঘেৰাও কৰি এক উত্তাল পৰিস্থিতিৰ সৃষ্টি কৰে ৷
উল্লেখ্য যে, বিগত কিছুদিন পূৰ্বে কংগ্ৰেছৰ বেনাৰ, পোষ্টাৰ ফালি পেলোৱাৰ লগতে অফিচ মুকলি কৰাক লৈ সমষ্টিটোত মাৰপিট হোৱা বুলি কংগ্ৰেছে অভিযোগ উত্থাপন কৰিছিল ৷ সেয়ে বাজাৰিছড়া আৰক্ষী থানাত বিজেপি কৰ্মীৰ বিৰুদ্ধে কংগ্ৰেছে গোচৰ ৰুজু কৰিছিল আৰু সেই গোচৰৰ ভিত্তিত বাজাৰিছড়া আৰক্ষীয়ে বিজেপিৰ প্ৰায় পাঁচজন কৰ্মীক আটক কৰিছিল ।
এই ঘটনাৰ পাছতে প্ৰায় সহস্ৰাধিক বিজেপি কৰ্মীয়ে বাজাৰিছড়া থানা ঘেৰাও কৰি পৰিস্থিতি উত্তপ্ত কৰি তোলাৰ পাছত আৰক্ষীৰ লোকে আটক কৰা বিজেপি কৰ্মী কেইজনক মুক্ত কৰি দিবলৈ বাধ্য হয় ৷ বিজেপি প্ৰাৰ্থী কৃষ্ণেন্দু পালে আৰক্ষীৰ বিৰুদ্ধে পক্ষপাতিত্বৰ অভিযোগ আনি কয় যে, আৰক্ষীৰ লোকে বিজেপিয়ে তৰা গোচৰৰ তদন্ত নকৰাকৈ কংগ্ৰেছৰ পক্ষত গৈ বিজেপি কৰ্মী সকলক আটক কৰিছে ৷
উল্লেখ্য যে, বৰাক উপত্যকাৰ ভিতৰত বৰ্তমান উত্তপ্ত সমষ্টি হিচাপে চিহ্নিত হৈছে কৰিমগঞ্জ জিলাৰ পাথাৰকান্দি বিধানসভা সমষ্টি ৷ এইবাৰ সমষ্টিটোত মূল যুঁজখন কংগ্ৰেছ আৰু বিজেপিৰ মাজত হোৱাৰ সম্ভাৱনা স্পষ্ট হৈ পৰিছে ৷ ইতিমধ্যে প্ৰায় প্ৰতিদিনেই উভয় দলৰ কৰ্মী তথা সমৰ্থকসকল সমুখ সমৰত মিলিত হোৱাৰ লগতে বিভিন্ন অভিযোগ প্ৰতি অভিযোগেৰে পাথাৰকান্দি সমষ্টি এক প্ৰকাৰ উত্তপ্ত হৈ পৰিছে ৷
লগতে পঢ়ক: নজৰুল হকৰ নিৰ্দেশত হিংসাত্মক কাণ্ড সংঘটিত কৰাৰ অভিযোগ বিজেপি কৰ্মীৰ
