কৰিমগঞ্জ,১৫ জুলাই: যোৱা ফেব্ৰুৱাৰী মাহতে অসমৰ সীমান্ত জিলা কৰিমগঞ্জত অবৈধ অনুপ্ৰৱেশ কৰিছিল বাংলাদেশৰ ছয়েদ আলি নামৰ এজন ব্যক্তিয়ে । পাছত অবৈধ অনুপ্ৰৱেশকাৰী ছয়েদ আলিক আৰক্ষীয়ে আটক কৰি প্ৰেৰণ কৰিছিল কাৰাগাৰলৈ । কাৰাগাৰতে অসুস্থ হৈ পৰা এই বাংলাদেশী ব্যক্তিজনক চিকিৎসাৰ বাবে ভৰ্তি কৰোৱা হয় শিলচৰ চিকিৎসা মহাবিদ্যালয়ত । অৱশ্যে চিকিৎসা কৰি থকা অৱস্থাতে মৃত্যুক আকোৱালি ললে ছয়েদ আলিয়ে । মৃত্যুৰ পাছত ভাৰত চৰকাৰে বাংলাদেশ হাই কমিশ্ব্যনৰ লগত যোগাযোগ কৰি বাংলাদেশলৈ মৃতদেহ প্ৰেৰণৰ ব্যৱস্থা কৰে । কিন্তু মৃত ব্যক্তিজনৰ পৰিয়ালে আৰ্থিক অনাটনৰ বাবে শৱদেহ বাংলাদেশলৈ ঘূৰাই নিনিয়াৰ সিদ্ধান্ত গ্ৰহণ কৰি বাংলাদেশ হাই কমিশ্ব্যনৰ জড়িয়তে এখন শপতনামা প্ৰেৰণ কৰে ।
বাংলাদেশ হাই কমিশ্ব্যনৰ পৰা এই শপতনামা পোৱাৰ পাছতহে কৰিমগঞ্জ জিলা প্ৰশাসনে ইছলাম ধৰ্মীয় নিয়মেৰে ৪১দিন ধৰি শিলচৰ চিকিৎসা মহাবিদ্যালয়ৰ মৰ্গত ৰখা ছয়েদ আলিৰ শৱদেহটোৰ কবৰস্থ কৰে ।
