কৰিমগঞ্জ, 10 এপ্ৰীলঃ কৰিমগঞ্জ লোকসভা আসনত বিজেপি, কংগ্ৰেছৰ সমান্তৰালকৈ এ আই ইউ ডিএফ প্ৰাৰ্থী ৰাধেশ্যাম বিশ্বাসেও নিজৰ নিৰ্বাচনী প্ৰচাৰ চলাইছে । কৰিমগঞ্জ লোকসভা সমষ্টিৰ অন্তৰ্গত আঠটা বিধানসভা সমষ্টিত সমান্তৰালকৈ ভোটাৰক আকৃষ্ট কৰাৰ লক্ষ্যৰে নিৰ্বাচনী জনসভাত নিজৰ কামৰ খতিয়ান দাঙি ধৰি ভোট ভিক্ষা কৰিছে প্ৰাৰ্থী ৰাধেশ্যাম বিশ্বাসে । বিগত লোকসভা নিৰ্বাচনত এক লাখৰো অধিক ভোটত নিৰ্বাচিত হোৱা এ আই ইউ ডিএফ প্ৰাৰ্থী ৰাধেশ্যাম বিশ্বাসৰ জয়ৰ আঁৰৰ মূল কাৰক আছিল প্ৰাক্তন কংগ্ৰেছী মন্ত্ৰী ছিদ্দিক আহমেদ । কিন্তু এইবাৰ ৰাধেশ্যাম বিশ্বাসৰ লগত নাই ছিদ্দিক আহমেদৰ কৃপাদৃষ্টি ।
আনহাতে দলৰ ভিতৰচ'ৰাতো আছে ব্যাপক অসন্তুষ্টি । এনে পৰিস্থিতিত এইবাৰ কৰিমগঞ্জ লোকসভা আসনখন কি দৰে পুনৰুদ্ধাৰ হ'ব ? সাংবাদিকে কৰা এই প্ৰশ্নৰ উত্তৰত ৰাধেশ্যাম বিশ্বাসে কলে, ‘ৰাইজৰ কাৰণে মই বহু কাম কৰিছো। সেয়ে ৰাইজে পুনৰ মোক ভোট দি দিল্লীলৈ পঠিয়াব । আৰু মোৰ প্ৰতিদ্বন্দিতা হ'ব বিজেপি প্ৰাৰ্থী কৃপানাথ মাল্লাহৰ সৈতে, কংগ্ৰেছ এইবাৰ থাকিব তিনি নম্বৰত’। আনহাতে ছিদ্দিক আহমেদৰ প্ৰসংগত প্ৰশ্ন সোধাত ৰাধেশ্যাম বিশ্বাসে অকপটে স্বীকাৰ কৰিলে ছিদ্দিক আহমেদৰ প্ৰতি তেওঁৰ কৃতজ্ঞতাৰ কথা ৷ পিচে এইবাৰ ছিদ্দিক আহমদে কাক সহায় আগবঢ়াই স্বৰূপ দাস নে ৰাধেশ্যাম বিশ্বাসক সেয়া লক্ষ্যণীয় হ'ব ৷
