কৰিমগঞ্জ, 18 জুলাই : ক্ৰমাৎ গণ সংক্ৰমণৰ দিশে আগবাঢ়িছে কৰিমগঞ্জ জিলা । বুধবাৰে কৰিমগঞ্জৰ বিভিন্ন এলেকাৰ 11 জন নাপিতৰ দেহত ধৰা পৰিছে কৰ’ণা ভাইৰাছৰ উপস্থিতি ৷ আক্ৰান্ত নাপিতকেইজনৰ নাছিল কোনো ভ্ৰমণ বৃত্তান্ত ।
কিন্তু নিলামবজাৰ এলেকাত 5 জন চেলুন কৰ্মীৰ কৰ’ণা পজিটিভ হোৱা ঠাইত এতিয়াও মুকলিকৈ চলিছে চেলুনৰ কাম । আনহাতে বজাৰ এলেকাত ৰাইজে মাস্ক পৰিধান নকৰাকৈ ঘুৰি ফুৰাৰ পিছতো নিধিৰাম চৰ্দাৰৰ ভূমিকা পালন কৰি আছে আৰক্ষী-প্ৰশাসনে ।
অঞ্চলটোৰ এগৰাকী নাপিতে অন কেমেৰাত উদঙাই দিয়ে স্থানীয় প্ৰশাসনৰ দায়িত্বহীনতাৰ কথা । নাপিতসকল কৰ’ণাত আক্ৰান্ত হোৱাৰ পাচতো নিলামবজাৰ এলেকাৰ আন চেলুন তথা বিউটি পাৰ্লাৰ সন্দৰ্ভত প্ৰশাসনে গ্ৰহণ কৰা নাই কোনো বিশেষ ব্যৱস্থা । ইয়াৰ বাবে প্ৰশাসনক জগৰীয়া কৰে স্থানীয় সচেতন লোকে ৷
উল্লেখ্য যে, সম্প্ৰতি কৰিমগঞ্জ জিলাত 383 গৰাকী কৰ’ণাত আক্ৰান্ত ৰোগী চিনাক্ত হৈছে ।
লগতে পঢ়ক : মুখ্যমন্ত্ৰীৰ ঘৰৰ কাষৰ পৰাই গৰু লৈ উধাও চোৰ
