ডিফু, 16 মাৰ্চ : সমগ্ৰ বিশ্বৰ লগতে বিশ্ব গ্ৰাহক অধিকাৰ দিৱস (World Consumer Rights Day 2022) ৰ লগত সংগতি ৰাখি কাৰ্বি আংলঙৰ সদৰ চহৰ ডিফুত আয়োজন কৰা হয় এক সজাগতা সভা ৷ জিলা আইন সেৱা প্ৰাধিকৰণৰ উদ্যোগত আৰু অল হিলছ ট্ৰাইব্ছ চেম্বাৰ অৱ কমাৰ্চ এণ্ড ইণ্ডাষ্ট্ৰীজৰ সহযোগত গ্ৰেটাৰ বজাৰ কমিটীৰ ডিফুৰ কাৰ্যালয়ত আয়োজন কৰা হয় এই সজাগতা সভাখনিৰ (World consumer rights day observed at Diphu) ৷ এই সভাত নিৰ্দিষ্ট বক্তা হিচাপে উপস্থিত থাকে ডিফু ন্যায়িক আদালতৰ অধিবক্তা ৰশ্মি ভড়ালী আৰু সোণম স্বামী ৷
দুয়োগৰাকী বক্তাই উপস্থিত দৰ্শকসকলক উদ্দেশ্যি গ্ৰাহকসকলৰ আইনগত অধিকাৰৰ দিশসমূহৰ ওপৰত বিস্তৃতভাৱে বাখ্যা আগবঢ়ায় ৷ অধিবক্তা সোণম স্বামীয়ে ভাষণ প্ৰসংগত কয় যে, বিক্ৰেতাই গ্ৰাহকসকলক বিক্ৰীজাত সামগ্ৰীৰ গুণগত দিশটো ভালদৰে বুজাই দিব লাগে ৷ এইটো গ্ৰাহকৰ অধিকাৰ ৷ গ্ৰাহকে সামগ্ৰী ক্ৰয় কৰাৰ সময়ত সচেতন ৰোৱাটো বাঞ্চনীয় (Consumer Rights and Responsibilities That Every Indian Should Know) ৷
এই সভাতে আন এগৰাকী অধিবক্তা ৰশ্মি ভড়ালীয়ে কয় যে, ক'ভিডকালীন পৰিস্থিতিৰ বাবে বিভিন্ন ডিজিটেল এপৰ জৰিয়তে নগদ ধনবিহীন লেনদেনৰ আৰম্ভ হৈছে ৷ ডিজিটেল বিত্তীয় এপসমূহ ব্যৱহাৰ কৰোতে গ্ৰাহকসকল সজাগ হ’ব লাগে ৷ যাতে প্ৰৱঞ্চকৰ দ্বাৰা প্ৰতাৰিত নহয় ৷
লগতে তেওঁ গ্ৰাহকৰ অধিকাৰৰ বিশেষত্বসমূহ সহজ ভাষাৰে উপস্থিত ৰাইজক বুজাই দিয়ে ৷ গ্ৰাহকসকলৰ বুনিয়াদী সহায়ৰ বাবে নিকটতম সংশ্লিষ্ট আদালতৰ দ্বাৰস্থ হ’ব লাগে বুলিও তেওঁ উল্লেখ কৰে ৷ ইয়াৰোপৰি এই গ্ৰাহক সজাগতা সভাত উপস্থিত থকা অধিবক্তাদ্বয়ে গ্ৰাহকসকলৰ বিভিন্ন প্ৰশ্নৰ উত্তৰ দিয়ে ৷ মঙলবাৰে আয়োজিত এই সজাগতা সভাত অল হিলছ ট্ৰাইব্ছ চেম্বাৰ অৱ কমাৰ্চ এণ্ড ইণ্ডাষ্ট্ৰীৰ অধ্যক্ষ বিৰতন টেৰণ, সচিব জন টেণ্ডন বে’ আৰু বিত্তীয় সচিব ৰাংচিনা বে’ আদি উপস্থিত থাকে ৷
লগতে পঢ়ক : World Consumer Rights Day 2022 : বিশ্ব গ্ৰাহক সুৰক্ষা দিৱস কিয় প্ৰয়োজনীয় ?
