ডিফু, 28 ছেপ্টেম্বৰঃ ডকমকা অপহৰণ কাণ্ডৰ লগত ই এম ৰতন টেৰণৰ নাম সাঙোৰ খোৱাৰ পাচতে আজি প্ৰথমবাৰৰ বাবে সংবাদমেল যোগে প্ৰতিক্ৰিয়া ব্যক্ত কৰিলে কাৰ্বি আংলং স্বায়ত্ত শাসিত পৰিষদৰ কাৰ্যবাহী সদস্য তথা পূব কাৰ্বি আংলং বিজেপিৰ সভাপতি ৰতন টেৰণে ৷ উল্লেখ্য যে ডকমকাৰ অপহৃত ব্যৱসায়ী বিজয় আগৰৱালাক কাৰ্বি আংলং জিলাৰ হাওৰাঘাটৰ পৰা আৰক্ষীয়ে সুস্থ শৰীৰে উদ্ধাৰ কৰাৰ লগতে তিনিজনকৈ অপহৰণকাৰীক আৰক্ষীয়ে আটক কৰা ঘটনাত বিজেপি আৰু ইএম ৰতন টেৰণৰ নাম সাঙোৰ খাইছিল ৷
আজি কাৰ্যবাহী সদস্য গৰাকীৰ চৰকাৰী বাসভৱনত তেওঁ এক সংবাদমেল আয়োজন কৰি প্ৰথমে অপহৰণ কাৰ্যক তীব্ৰ গৰিহণা দিয়ে আৰু জিলা আৰক্ষী প্ৰশাসনে নিৰাপদে অপহৃত ব্যৱসায়ী গৰাকীক উদ্ধাৰ কৰাৰ বাবে ধন্যবাদ জনায় ৷ সমান্তৰালকৈ গ্ৰেপ্তাৰ হোৱা তিনি অপৰাধীক কঠোৰৰ পৰা কঠোৰতম শাস্তি প্ৰদান কৰিবলৈকো দাবী উত্থাপন কৰে টেৰণে ৷ ইয়াৰোপৰিও সমগ্ৰ ঘটনাক লৈ একাংশ বৈদ্যুতিন আৰু ছপা মাধ্যমত তেওঁৰ নাম আৰু ইয়াৰ মাজত বিজেপি দলক সাঙোৰি লোৱা কাৰ্যৰ বাবে তেওঁ মনোকষ্ট পাইছে বুলি মন্তব্য কৰে ৷ তেওঁ ইয়াকো কয় যে, হাওৰাঘাটত থকা অপহৰণকাৰী তপন টেৰণ তেওঁৰ ভাতৃ হয় যদিও পৰিয়াল কেন্দ্ৰিক সংঘাতৰ বাবে বহু পূৰ্বেই তেওঁ আৰু তেওঁৰ পৰিয়ালৰ সদস্যৰ সৈতে সম্পৰ্ক বিচ্ছিন্ন হৈ আছে ৷ তদুপৰি তেওঁ কয় যে উক্ত ঘটনাত তেওঁৰ নাম সাঙোৰ খাই পৰাটো দুৰ্ভাগ্যজনক ৷ কিয়নো এগৰাকী বিজেপি নেতা-কৰ্মী আৰু ই এম হিচাপে তেওঁৰ কাৰ্যকালত আজিলৈকে কোনো কালিমা সানিব পৰা নাই,একনিষ্ঠ আৰু সততাৰে বিজেপি আৰু দলক সেৱা আগবঢ়াই গৈছে ৷ সেয়ে ই এম টেৰণে এটা অপৰাধ মূলক ঘটনাত তেওঁৰ নাম সাঙোৰি তেওঁৰ ৰাজহুৱা জীৱন বিতৰ্কৰ মাজত ঠেলি বাতৰি পৰিবেশন নকৰিবলৈ সংবাদমেল যোগে সাংবাদিক সকলক অনুৰোধ জনাইছে ৷
