ডিফু,6 এপ্ৰিল: পুনৰ অশান্ত হৈছে অসম-নাগালেণ্ড সীমান্ত ৷ সোমবাৰে সন্ধিয়া অসম-নাগালেণ্ড সীমান্ত অঞ্চলত সৃষ্টি হয় তীব্ৰ উত্তেজনা ৷ কাৰ্বি আংলং জিলাৰ দলদলী সংৰক্ষিত বনাঞ্চলত সংঘটিত হয় অপ্ৰীতিকৰ ঘটনা ৷ সন্ধিয়া সংৰক্ষিত বনাঞ্চলত থকা বন বিভাগৰ শিবিৰত অগ্নিসংযোগ কৰে নগা দুৰ্বৃত্তই ৷ ঘটনাস্থলীত শীৰ্ষ পৰ্যায়ৰ আৰক্ষীৰ লোক উপস্থিত হৈ ঘটনাৰ তদন্তৰ বাবে সংবাদ মাধ্যমৰ প্ৰৱেশ নিষিদ্ধ কৰিছিল ৷
কিন্তু, জিলা আৰক্ষী অধীক্ষক দেৱজিৎ দেউৰীয়ে সংবাদ মাধ্যমৰ আগত মন্তব্য কৰি কয়, সমগ্ৰ ঘটনাক লৈ সন্দেহৰ সৃষ্টি হৈছে আৰু ইয়াৰ ওপৰত এক তদন্তৰ প্ৰয়োজন আছে ৷ যদিহে শিবিৰটোত অস্ত্ৰ-শস্ত্ৰলৈ সু-সজ্জিত হৈ গণ আক্ৰমণ হৈছিল তেন্তে শিৱিৰটোৰ খুঁটা বা অইন বস্তুত আক্ৰমণৰ চিন থাকিলেহেঁতেন কিন্তু তেনে কোনো চিন পৰিলক্ষিত হোৱা নাই ৷ এই অগ্নিকাণ্ডৰ বাবেই শিৱিৰটোত থকা অস্ত্ৰসমূহ জ্বলি যায় বুলি স্বীকাৰ কৰে যদিও তদন্তৰ পাচতহে প্ৰকৃত কাৰণ পোহৰলৈ আহিব বুলি উল্লেখ কৰে ৷
লগতে পঢ়ক: EVM বিকলকলৈ ৰৌমাৰী এল পি স্কুলত উত্তপ্ত পৰিস্থিতি
