কাৰ্বি-আংলং,6আগষ্টঃ ভূ মাফিয়াই কেৰেপ নকৰে কাৰ্বি আংলং আৰক্ষী তথা দেশৰ উচ্চতম ন্যায়ালয়ক । দেশৰ উচ্চতম ন্যায়ালয়ে শিল খননত নিষেধাজ্ঞা প্ৰদান কৰাৰ পাচতো কাজিৰঙা আৰু দাঁতিকাষৰীয়া অঞ্চলত একাংশ ভূ মাফিয়াই অবাধে শিলখনন কাৰ্য অব্যাহত ৰাখিছে ৷ তাৰেই পৰিপ্ৰেক্ষিতত বোকাজান মহকুমা আৰক্ষী বিষয়া পদ্ম কুমাৰ পেগুৱে সোমবাৰে নিশা কাৰ্বি আংলঙৰ ডলামৰা থানাৰ অন্তৰ্গত গেলেকি অঞ্চলত অভিযান চলাই এটা শিলৰ কুৱেৰী উৎখাত কৰে । এই অভিযান কালত কুৱেৰীটোৰ পৰা উদ্ধাৰ হয় ক্ৰেচাৰ মেচিন, এখন ট্ৰাক( as09a4902), মটৰ চাইকেল (AS05F1181) সহ খননত ব্যৱহৃত বহু সামগ্ৰী ।
ইপিনে অবৈধ কুৱেৰীটো পাহাৰীয়া অঞ্চলত হোৱাৰ বাবে আৰক্ষীৰ বাহন দেখি পলায়ন কৰে ভূ মাফিয়া সহ খননত জড়িত অন্য লোকসকলে । কিন্তু পাচত ৰাতিৰ ভিতৰতে আৰক্ষীয়ে আটক কৰে 2 টাকৈ মাফিয়াক । মটৰ চাইকেলেৰে পলায়ন কৰাৰ সময়তে আৰক্ষীয়ে খেদি আটক কৰে বোকাখাটৰ মুনিন বৰা নামৰ মাফিয়াক ৷ তাৰপাছতেই মুনিন বৰাৰ তথ্যৰ ভিত্তিত আটক কৰে যুগল বৰুৱা নামৰ আনটো মাফিয়াক ।
