ডিফু, ২৪ ডিচেম্বৰ: অসম সাহিত্য সভাৰ প্ৰাক্তন সভানেত্ৰীৰ নলিনীৱালা দেৱীৰ মৃত্যু দিৱসৰ লগত সংগতি ৰাখি বৃহস্পতিবাৰে ডিফুৰ ৰাংছিনা ভৱনত উন্মোচন কৰা হয় অসম সাহিত্য সভাৰ ডিফু আঞ্চলিক শাখা সমিতিৰ মুখপত্ৰ আলোচনী "মিৰজাংছিক" ৷ মিৰজাংছিকৰ অসমীয়া অনুবাদ সৰু সৰু ফুল ৷ ইয়াৰোপৰি একেখন মঞ্চতে উন্মোচন হয় যুৱ প্ৰজন্মৰ গায়িকা তথা সমাজ কৰ্মী ব্ৰহ্মানন্দ বৰাৰ কন্যা হিমাক্ষী বৰাৰ কণ্ঠত প্ৰাণ পোৱা এক সুৱলা গীতৰ এলবাম "পাহাৰীয়া ছোৱালী" ৷
মিৰজাংজিক আৰু গীতৰ এলবাম খনৰ শুভ উন্মোচন কৰে ক্ৰমে, ডিফু শাখা সাহিত্য সভাৰ প্ৰাক্তন সভাপতি কৰেণ দাস আৰু ৰবীন চন্দ্ৰ গোস্বামীয়ে ৷ ডিফু সাহিত্য সভাৰ প্ৰাক্তন সভাপতি উদ্ধৱ চন্দ্ৰ মহন্তৰ পৌৰোহিত্যত অনুষ্ঠিত সভাখনৰ উদ্দেশ্য বাখ্যা কৰাৰ লগতে সভাখনৰ আঁত ধৰে মিৰজাংছিকৰ প্ৰাক্তন সম্পাদক ব্ৰহ্মানন্দ বৰাই ৷ সভাৰ আৰম্ভণিতেই অসম সাহিত্য সভাৰ প্ৰথম গৰাকী সভানেত্ৰী নলিনীবালা দেৱীৰ প্ৰতিচ্ছবিত পুষ্পাঞ্জলি অৰ্পন কৰে উপস্থিত ৰাইজে ৷ বিশিষ্ট লেখিকা তথা মিৰজাংছিক মুখপত্ৰ খনৰ সম্পাদিকা গীতা বৰাই আলোচনীখন ৰাইজলৈ আগুৱাই দিয়াৰ ক্ষেত্ৰত পোৱা তিতা-মিঠা অভিজ্ঞতাখিনি প্ৰকাশ কৰে আৰু আলোচনী খনৰ বিভিন্ন শিতানৰ বিষয়ে আলোকপাত কৰে ৷ লগতে আলোচনী খনৰ ক্ষেত্ৰত লেখক-লেখিকা সকললৈ কৃতজ্ঞতা প্ৰকাশ কৰে ৷
