ডিফু,26 এপ্ৰিল: অবৈধ ড্ৰাগছৰ বিৰুদ্ধে কাৰ্বি আংলং আৰক্ষীয়ে অসম-নাগালেণ্ড সীমান্ত অঞ্চলত পুনৰ লাভ কৰিছে এক বৃহৎ সফলতা ৷ প্ৰাপ্ত তথ্য অনুসৰি, বোকাজান মহকুমাৰ অন্তৰ্গত ডিলাই আৰক্ষীয়ে দেওবাৰে চলোৱা এক অভিযানত বুজন পৰিমাণৰ ড্ৰাগছসহ এজন সৰবৰাহকাৰীক গ্ৰেপ্তাৰ কৰিবলৈ সক্ষম হয় ৷
আৰক্ষী সূত্ৰে লাভ কৰা তথ্য অনুসৰি, এক গোপন সূত্ৰৰ ভিত্তিত দেওবাৰে দিনৰ প্ৰায় 5.30 বজাত ডিলাই আৰক্ষী থানাৰ ভাৰপ্ৰাপ্ত বিষয়া বিতোপন চুতীয়া তথা সহকাৰী উপ-পৰিদৰ্শক জিতেন গগৈৰ নেতৃত্বত ডিলাই আৰক্ষীৰ এটা অভিযানকাৰী দলে 36 নং ৰাষ্ট্ৰীয় ঘাইপথত চলাই এক তালাচী অভিযান । উক্ত অভিযানত আৰক্ষীৰ দলটোৱে ইম্ফলৰ পৰা গুৱাহাটী অভিমুখী এএছ ০১ ইটি ০৯১০ নম্বৰৰ এখন টাটা ছাফাৰী গাড়ীত তালাচী চলাই সত্তৰটা চাবোনৰ বাকচত মুঠ ৭৭৫ গ্ৰাম হেৰ’ইন উদ্ধাৰ কৰিবলৈ সক্ষম হয় ।
উল্লেখ্য যে, উদ্ধাৰ হোৱা ড্ৰাগছসমূহ গাড়ীখনৰ ইঞ্জিনৰ কেবিনৰ এক গোপন কক্ষত লুকুৱাই অনা হৈছিল ৷ এই সন্দৰ্ভত আৰক্ষীয়ে এজন ড্ৰাগছ সৰবৰাহকাৰীক গ্ৰেপ্তাৰ কৰে । ড্ৰাগছ সৰবৰাহকাৰী গৰাকী মণিপুৰৰ ইম্ফলৰ লিলং আৰক্ষী থানাৰ অন্তৰ্গত লিলং গাঁৱৰ আফটাব আলীৰ পুত্ৰ মাজিদ আলী বুলি চিনাক্ত কৰা হৈছে ৷
আনহাতে, অধিক তথ্যৰ বাবে ডিলাই আৰক্ষীয়ে ড্ৰাগছ সৰবৰাহকাৰীজনক জেৰা অব্যাহত ৰাখিছে ৷ বোকাজান মহকুমা আৰক্ষী বিষয়া জন দাসৰ তত্বাৱধানত জব্দ কৃত ড্ৰাগছসমূহৰ আন্তঃৰাষ্ট্ৰীয় বজাৰমূল্য প্ৰায় ৫ কোটি ৫০ লাখ বুলি আৰক্ষী সূত্ৰে প্ৰকাশ ।
লগতে পঢ়ক: ভাৰতত নতুনকৈ ৩,৫২,৯৯১ জন কৰ'ণাত আক্ৰান্ত
