ডিফু,৮ জানুৱাৰী: অহা ১৬ জানুৱাৰীত অনুষ্ঠিত হ'ব অসম সাহিত্য সভাৰ অন্তৰ্গত হাওৰাঘাট শাখা সাহিত্য সভাৰ সোণালী জয়ন্তী সমাৰোহৰ বৰ্ণাঢ্য অনুষ্ঠান । হাওৰাঘাটৰ শংকৰ মন্দিৰ প্ৰাংগণত এদিনীয়া বৰ্ণিল কাৰ্যসূচীৰে অনুষ্ঠিত হ'ব এই সোণালী জয়ন্তী সমাৰোহ । ইতিমধ্যে প্ৰস্তুতি প্ৰায় সম্পূৰ্ণ হৈছে ।
সোণালী জয়ন্তী সমাৰোহৰ দিনা পুৱা পতাকা উত্তোলন কাৰ্যসূচীৰে হাওৰাঘাট শাখা সাহিত্য সভাৰ সোণালী জয়ন্তী সমাৰোহৰ বৰ্ণময় অনুষ্ঠানৰ আনুষ্ঠানিক শুভাৰম্ভ কৰিব আদৰণি সমিতিৰ সভাপতি ভৱেশ বৰাই । পৰৱৰ্তী কাৰ্যসূচী অনুসৰি স্মৃতি তৰ্পণ,শাখাৰ প্ৰয়াত প্ৰাক্তন সভাপতি-সম্পাদকসকলৰ নামত নৱনিৰ্মিত স্মৃতি তোৰণ উদ্ঘাটন,ভাৰত ৰত্ন ড০ ভূপেন হাজৰিকাৰ প্ৰতিমুৰ্ত্তিত মাল্যাৰ্পণ,হাওৰাঘাট শাখা সাহিত্য সভাৰ প্ৰতিষ্ঠাপক সভাপতি প্ৰয়াত ক্ষুদ্ৰ বৰাৰ প্ৰতিমূৰ্ত্তি উন্মোচন,শাখাৰ প্ৰয়াত প্ৰাক্তন সভাপতি-সম্পাদকসকলক মৰণোত্তৰভাৱে সম্বৰ্ধনা আৰু দিনৰ ১ বজাৰ পৰা মুকলি সভাৰ লগতে অনুষ্ঠিত হ'ব গ্ৰন্থ উন্মোচনী সভা ।
গ্ৰন্থ উন্মোচনী সভাত মুখ্য অতিথিৰ আসন অলংকৃত কৰিব অসম সাহিত্য সভাৰ উপ-সভাপতি মৃণালিনী দেৱীয়ে । হাওৰাঘাট শাখা সাহিত্য সভাৰ সোণালী জয়ন্তী সমাৰোহৰ স্মৃতিগ্ৰন্থ 'যমুনাৰ সংগম' আনুষ্ঠানিকভাৱে উন্মোচন কৰিব ৰংমিলিৰ হাঁহিৰ স্ৰষ্টা পদ্মশ্ৰী ৰংবং তেৰাঙে । এই অনুষ্ঠানতে হাওৰাঘাট অঞ্চলৰ ৫০ গৰাকী বিশিষ্ট ব্যক্তিক সম্বৰ্ধনা জ্ঞাপন কৰিব হাওৰাঘাট শাখা সাহিত্য সভাই ।
লগতে পঢ়ক: কমল কুমাৰ মেধি হ'ব নেকি "ৰাইজৰ দল"ৰ সভাপতি ?
