ৰঙিয়া, 13 ফেব্ৰুৱাৰী: দেওবাৰে ৰঙিয়াত পৃথকে পৃথকে সংঘটিত দুটাকৈ পথ দুৰ্ঘটনাত এগৰাকী মহিলাকে ধৰি দুজন লোকৰ মৃত্যুৰ ঘটনাই সমগ্ৰ অঞ্চলজুৰি এক শোকাকুল পৰিৱেশে বিৰাজ কৰিছে (Two people including a woman killed in road accident) ।
ইয়াৰে প্ৰথমটো দুৰ্ঘটনা ৰঙিয়াৰ ভাতকুছিত সংঘটিত হয় । নলবাৰী অভিমুখী দ্ৰুতবেগী কন্টেইনাৰ এখনে মহতিয়াই নিয়াৰ ফলত সংঘটিত দুৰ্ঘটনাটোত এগৰাকী মহিলা মৃত্যুমুখত পৰে । দুৰ্ঘটনাটোত মৃত্যু হোৱা মহিলা গৰাকী হৈছে ৰঙিয়াৰ উদিয়ানাৰ জাহিৰা বিবি (৬০) । মহিলাগৰাকীয়ে ২৭ নং ৰাষ্ট্ৰীয় ঘাইপথ অতিক্ৰম কৰিবলৈ লওতে HR 61 D 7012 নম্বৰৰ কন্টেইনাৰখনে মহতিয়াই লৈ যায় ।
ইয়াৰ পাছতেই স্থানীয় লোকে মহিলাগৰাকীক ততাতৈয়াকৈ চিকিৎসালয়লৈ প্ৰেৰণ কৰাৰ ব্যৱস্থা কৰে যদিও চিকিৎসালয়লৈ নিয়াৰ পথতে মহিলাগৰাকীৰ মৃত্যু হয় (Woman killed in road accident) । ইফালে দুৰ্ঘটনা সংঘটিত কৰি কণ্টেইনাৰখনে পলায়নৰ চেষ্টা কৰে যদিও স্থানীয় ৰাইজৰ তৎপৰতাত চালকসহ কণ্টেইনাৰখন আবদ্ধ কৰা হয় । পিছত ঘটনাস্থলীত ৰঙিয়া আৰক্ষী উপস্থিত হৈ কন্টেইনাৰখন জব্দ কৰি ৰঙিয়া থানালৈ লৈ আহে ।
আনহাতে ৰঙিয়াৰ জয়ন্তীপুৰত সংঘটিত হয় দ্বিতীয়টো দুৰ্ঘটনা । বৰলীয়া নৈৰ দলঙত সংঘটিত হোৱা দুৰ্ঘটনাটোত এজন ছাত্ৰ থিতাতে নিহত হয় (Student died in road accident) । জানিব পৰা মতে, উদিয়ানা অভিমুখী ই ৰিক্সা এখনে নিয়ন্ত্ৰণ হেৰুৱাই জয়ন্তীপুৰৰ বৰলীয়া নৈৰ ওপৰত থকা পকী দলঙখনত তীব্ৰবেগেৰে খুন্দা মৰাৰ ফলত দুৰ্ঘটনাটো সংঘটিত হয় (E Rickshaw accident at Jayantipur)। দুৰ্ঘটনাটোত ই ৰিক্সাত গৈ থকা এজন ছাত্ৰ ই-ৰিক্সাখনৰ তলত পৰি থিতাতে কৰুণ মৃত্যুক সাৱটি লয় । মৃত ছাত্ৰজন হৈছে পিতাম্বৰ হাটবজালীৰ নিবাসী চণ্ডিৰাম কলিতা আৰু কবিতা কলিতাৰ সন্তান তথা পিতাম্বৰ আদৰ্শ হাইস্কুলৰ দশম মান শ্ৰেণীত অধ্যয়নৰত নিতুমণি কলিতা (১৬) বুলি জানিব পৰা গৈছে ।
নিতুমণি কলিতাই অধ্যয়নৰত বিদ্যালয়খনৰ দশম শ্ৰেণীৰ বিদায় সভাৰ বাবে বজাৰলৈ ওলাই যোৱাৰ সময়তে দুৰ্ঘটনাটো সংঘটিত হৈ মৃত্যুমুখত পৰে (Road Accident in Rangia) । ইফালে ই-ৰিক্সাৰ চালকজনে দুৰ্ঘটনাটো সংঘটিত কৰিয়েই ই-ৰিক্সাসহ সেই স্থানৰ পৰা পলায়ন কৰে । একেটা দিনতে পৃথকে পৃথকে সংঘটিত দুটাকৈ পথ দুৰ্ঘটনাত দুগৰাকীকৈ লোকে মৃত্যুক সাৱটি লোৱা এই ঘটনাই সমগ্ৰ ৰঙিয়া অঞ্চলটোতে শোকৰ ছাঁ পেলাইছে ।
লগতে পঢ়ক: Road accident in Goreswar: গোৰেশ্বৰত পথ দুৰ্ঘটনাত গুৰুতৰভাৱে আহত দুগৰাকী যুৱতী
