পুৱা 11 বজাৰ শীৰ্ষ দহটা বাতৰি

পুৱা 11 বজাৰ শীৰ্ষ দহটা বাতৰি

প্ৰধানমন্ত্ৰী নৰেন্দ্ৰ মোডীয়ে ভাৰ্চুৱেল মাধ্যমেৰে ভাৰতীয় আৰক্ষী সেৱাৰ (IPS) প্ৰশিক্ষাৰ্থী বিষয়াসকলৰ পাছিং আউট পেৰেডত সম্বোধন কৰিব ৷ এই অনুষ্ঠানৰ আয়োজন কৰা হৈছে ছৰ্দাৰ বল্লৱভাই পেটেল ৰাষ্ট্ৰীয় আৰক্ষী প্ৰতিষ্ঠান প্ৰাংগনত ৷

আজি IPS প্ৰশিক্ষণপ্ৰাপ্ত বিষয়াসকলক সম্বোধন কৰিব প্ৰধানমন্ত্ৰী মোডীয়ে ৷ সমান্তৰালকৈ আজি বিত্ত আয়োগে নিজৰ অৰ্থনৈতিক উপদেষ্টা পেনেলৰ সৈতে এক বৈঠকত মিলিত হ’ব ৷ ইয়াৰ উপৰিও ক’ভিড-19ৰ সময়ত সুশাসন সন্দৰ্ভত এক কৰ্মশালা সম্বোধন কৰিব কেন্দ্ৰীয় মন্ত্ৰী জিতেন্দ্ৰ সিঙে ৷

শাৰদীয় দূৰ্গোৎসৱলৈ মাজত মাথো এটা মাহ ৷ এনে সময়ত সংযুক্ত মুক্তি বাহিনী, অসম (স্বাধীন)য়ে অসমবাসীলৈ উদ্দেশ্যি প্ৰেৰণ কৰিছে এক বাৰ্তা ৷ বাৰ্তাটোৰ জড়িয়তে এইবাৰৰ শাৰদীয় দূৰ্গোৎসৱ উদযাপন নকৰিবলৈ জনাইছে আহ্বান ৷

ধুবুৰী জিলাৰ পশ্চিম বিলাসীপাৰাত বৃহস্পতিবাৰে নিশা আৰক্ষীয়ে উদ্ধাৰ কৰিলে গৰু আৰু মহৰ এটা বৃহৎ জাক ৷ আৰক্ষীয়ে অভিযানত পশুধন সমুহ উদ্ধাৰ কৰিবলৈ সক্ষম হয় যদিও এন্ধাৰৰ সুযোগ লৈ পলায়ন কৰে এই চোৰাং সৰবৰাহৰ লগত জড়িত দলটো ৷

বৃহস্পতিবাৰে মৰিগাঁৱত উপস্থিত হ’ল ৰাজ্যৰ মুখ্যমন্ত্ৰী সৰ্বানন্দ সোণোৱাল ৷ মুখ্যমন্ত্ৰীগৰাকীয়ে অসম মীন উন্নয়ন নিগম লিমিটেডৰ উদ্যোগত নিৰ্মান হ’বলগীয়া গ্ৰাম্য পাৰিপাৰ্শ্বিক পৰ্যটন আৰু অতিথি গৃহটিৰ আধাৰশিলা স্থাপন কৰাৰ লগতে সাহিত্যৰথী লক্ষ্মীনাথ বেজবৰুৱা মণিষী উপবনৰো কৰিলে শুভ উদ্বোধন ৷

ইচ্ছা মৃত্যু বিচাৰি ৰাজ্যপাল আৰু মুখ্য ন্যায়ধীশলৈ আবেদন কৰিছে অন্ধ্ৰ প্ৰদেশৰ এগৰাকী ব্যক্তিয়ে ৷ গাঁওবাসীয়ে চৰকাৰী ভূমি বলপূৰ্বকভাবে অধিগ্ৰহণ কৰাৰ অভিযোগ উত্থাপন কৰি ব্যক্তি গৰাকীৰ লগতে তেওঁৰ পৰিয়ালক এঘৰীয়া কৰাৰ বাবে এই সিদ্ধান্ত লোকজনৰ ৷

অৱশেষত গুৱাহাটী বিশ্ববিদ্যালয় কৰ্তৃপক্ষই ঘোষণা কৰিলে বি.এডৰ চূড়ান্ত বৰ্ষৰ পৰীক্ষাৰ সময়সূচী । বৃহস্পতিবাৰে সন্ধিয়াৰ ভাগত প্ৰকাশ কৰা হয় পৰীক্ষাৰ সময়সূচী । সময়সূচী অনুসৰি, 15 ৰ পৰা 20 চেপ্তেম্বৰৰ ভিতৰত অনুষ্ঠিত হ'ব প্ৰেক্টিকেল পৰীক্ষা আৰু 22 ৰ পৰা 29 চেপ্তেম্বৰৰ ভিতৰত অনুষ্ঠিত হ'ব লিখিত পৰীক্ষা ।

ধেমাজিৰ দিখাৰী নদীত মাছ মাৰিবলৈ গৈ এজন লোকৰ সলিল সমাধি ৷ মৃত্যু হোৱা লোকজন চিলাপথাৰ থানাৰ অন্তৰ্গত দিপা বগৰীগুৰী গাঁৱৰ পুতুল বসুমতাৰীৰ পুত্ৰ ৰাজা বসুমতাৰী বুলি জানিব পৰা গৈছে ৷

অসম বিধান সভাত দ্য আছাম মিউনিচিপাল বিধেয়ক গৃহীত ৷ আগন্তুক এবছৰত যি সমূহ পৌৰসভা বা নগৰ সমিতিৰ কাৰ্যকাল শেষ হ’ব সেই সমূহ স্থানীয় জিলা উপায়ুক্ত বা চক্ৰ বিষয়াৰ দ্বাৰা পৰিচালিত হ’ব ৷

শিশু নির্যাতনকাৰী চিকিৎসক ডাঃ সিদ্ধি প্রসাদ দেউৰী আৰু মৰাণ মহাবিদ্যালয়ৰ অধ্যক্ষা ড° মিতালী কোঁৱৰক গ্ৰেপ্তাৰত ব্যৰ্থ ডিব্ৰুগড় আৰক্ষী । ডিব্ৰুগড় সদৰ থানা ঘেৰাও প্ৰতিবাদকাৰীৰ ৷