ৰঙিয়া, 25 ছেপ্টেম্বৰ: ৰঙিয়াৰ ৩১নং ৰাষ্ট্ৰীয় ঘাইপথত সোমবাৰে নিশা সংঘটিত হয় এক ডকাইতিৰ ঘটনা ৷ পশ্চিম বংগৰ পৰা অহা মাৰুতি ভেনৰ চালকক নিচাজাতীয় দ্ৰব্য খুৱাই আক্ৰমণ কৰিলে দুজনীয়া দুৰ্বৃত্তৰ দলে ৷ ঘটনা অনুসৰি পশ্চিমবংগৰ পৰা গুৱাহাটীলৈ লৈ মাৰুতি ভেনখন ভাড়াত আনিছিল দুজন লোকে ৷ যাত্ৰা পথত চালক ৰফিকুল হকক অতি কৌশলেৰে নিচাজাতীয় দ্ৰব্য খুৱাই আক্ৰমণ কৰে দুই দুৰ্বৃত্তই ৷ ইয়াৰ পিছতে চালকজন অচেতন হৈ পৰাত তেওঁৰ পৰা মোবাইল ফোন,মানি বেগ,কাপোৰ কানি সকলো কাঢ়ি গাড়ীখনো লৈ যায় দুই দুৰ্বৃত্তই ৷ ইয়াৰ পাছতে চচাইটিৰ ৰাষ্ট্ৰীয় ঘাইপথৰ দাঁতিত গাড়ী চালকজনক পেলাই থৈ যায় অপৰাধী চক্ৰটোৱে ৷ আনহাতে মাৰুতি ভেনখন লৈ গুৱাহাটী অভিমুখে পলাই যায় অপৰাধী কেইজন ৷
পিছত ৰাইজৰ সহযোগত আৰক্ষীয়ে আহত চালকজনক উদ্ধাৰ কৰি চিকিৎসালয়ত ভৰ্তি কৰাই ৷ এই ঘটনাত আন্তঃৰাজ্যিক গাড়ী চুৰি চক্ৰ জড়িত থকাৰ সন্দেহ প্ৰকাশ কৰিছে ৰাইজে ৷ সততে ৰাষ্ট্ৰীয় ঘাইপথ ঘটি থকা এনে ঘটনাই উদ্বিগ্ন কৰি তুলিছে ৰাইজক ৷ ঘটনা সন্দৰ্ভত ইতিমধ্যেই তদন্ত আৰম্ভ কৰিছে আৰক্ষীয়ে ৷
