ৰঙিয়া,2 জানুৱাৰী : ৰঙিয়াৰ কেকেনিকুছী গাঁৱত দৰিদ্ৰ হিতাধিকাৰীৰ অন্ন সুৰক্ষাৰ বাবে প্ৰণয়ন কৰা ৰাষ্ট্ৰীয় খাদ্য সুৰক্ষা আইনখন উলংঘা কৰা হৈছে ৷ মৰাঞ্জনা গাঁও পঞ্চায়তৰ অন্তৰ্গত এই গাঁওখনৰ প্ৰায় 20 ঘৰ মানুহে বিগত প্ৰায় 5 বছৰৰ পৰা লাভ কৰা নাই চৰকাৰী চাউল ।
গাঁওখনৰ পৰিয়ালসমূহে এবাৰ পঞ্চায়তত, এবাৰ যোগান বিভাগৰ কাৰ্যালয়ত ঘূৰি এতিয়া ভাগৰি পৰিছে । প্ৰতিবাৰেই দুয়োটা বিভাগেই নিজৰ দোষ আনৰ গালৈ ঠেলি দি হেমাহি কৰাৰ অভিযোগ উত্থাপন কৰিছে স্থানীয় ৰাইজে । তেওঁলোকে এতিয়ালৈকে চাৰিবাৰকৈ সকলো নথি-পত্ৰ জমা দিছে কাৰ্যালয়ত। কিন্তু বিভিন্ন অজুহাতৰ বাবে তেওঁলোকক যোৱা প্ৰায় 5 বছৰে বঞ্চিত কৰি ৰখা হৈছে আইনখনৰ সুৰক্ষাৰ পৰা ।
ক’ভিডৰ আতংকৰ মাজত অভাৱ-অনাটনৰ মাজেৰে দিন অতিবাহিত কৰা হিতাধিকাৰীসকলে লকডাউনৰ সময়ছোৱাত কোনোধৰণৰ চৰকাৰী সাহাৰ্য লাভ নকৰা বুলি জানিবলৈ দিয়ে । চৰকাৰী মেৰপাকৰ ওচৰত হাৰ মানি এইসকল লোকে ইটিভিৰ জৰিয়তে চৰকাৰলৈ আহ্বান জনাইছে যাতে চৰকাৰে তেওঁলোকৰ ওপৰত সু-দৃষ্টি দি আঁচনিখনত অন্তৰ্ভুক্ত কৰি সকাহ প্ৰদান কৰে ।
লগতে পঢ়ক : বিগত দুটা বৰ্ষত কাজিৰঙা ৰাষ্ট্ৰীয় উদ্যানত হ্ৰাস পাইছে গঁড় হত্যাৰ ঘটনা
