ৰঙিয়া, ৯ অক্টোবৰ: ৰাষ্ট্ৰীয় খাদ্য সুৰক্ষা আইনৰ অধীনত দৰিদ্ৰ সীমা ৰেখাৰ তলৰ পৰিয়ালবোৰৰ বাবে সুলভ মূল্যৰ সামগ্ৰী প্ৰদানৰ ব্যৱস্থা কৰা হৈছে । কিন্তু ৰেচন কাৰ্ড ডিজিটাইজেশ্যনৰ নামত বহু এজেণ্টে সুলভ মূল্যৰ সামগ্ৰী লাভৰ পৰা দৰিদ্ৰ লোকসকলক বঞ্চিত কৰি আহিছে । ৰঙিয়াৰ খন্দিকৰতো এনেদৰে ৰাষ্ট্ৰীয় খাদ্য সুৰক্ষা আঁচনিৰ সুবিধা লাভৰ পৰা বঞ্চিত হ'বলগীয়া হৈছে কেইবাটাও পৰিয়াল । সুলভ মূল্যৰ সামগ্ৰী লাভ কৰিব নোৱাৰি ক্ষোভিত হৈ পৰিছে হিতাধিকাৰীসকল ।
শনিবাৰে খন্দিকৰৰ এই লোক সকলে অসমাৰিক যোগান বিভাগৰ বিৰুদ্ধে ধৰ্ণা কাৰ্যসূচী ৰূপায়ণ কৰে । ৰাইজৰ অভিযোগ অনুসৰি, ৰেচন কাৰ্ড থকাৰ পাচতো বহু পৰিয়ালে সুদীৰ্ঘ ২-৫ বছৰ ধৰি লাভ কৰা নাই সুলভ মূল্যৰ চাউল । তেওঁলোকে জনোৱা মতে, এজেন্টে কাৰ্ডসমূহ ডিজিটাইজেশ্যন কৰিবলৈ নথি-পত্ৰ বিচাৰিছিল হিতাধিকাৰীসকলৰ পৰা । কিন্তু সকলো নথি তিনিবাৰ পৰ্যন্ত জমা কৰাৰ পিছতো কেইবা বছৰ ধৰি আইনখনৰ অধীনত সুবিধা লাভৰ পৰা বঞ্চিত হৈ আছে অঞ্চলটোৰ প্ৰায় ২০০ গৰাকী হিতাধিকাৰী ।
ইয়াৰ উপৰিও, একাংশ এনে পৰিয়াল আছে, যাৰ মুঠ সদস্য পাঁচজন যদিও কাৰ্ডৰ জৰিয়তে চাউল লাভ কৰিছে এজন বা দুজন সদস্যইহে । সেয়ে, এতিয়া বানক্ৰান্ত অঞ্চলৰ দৰিদ্ৰ লোকসকলে দুবেলা দুমুঠি খাদ্য যোগাৰ কৰিবলৈও হাহাকাৰ কৰিবলগীয়া হৈছে ।
কৰ'ণা মহামাৰীৰ সংক্ৰমণ বৃদ্ধিৰ সময়ত লকডাউন জাৰি কৰাৰ সময়ছোৱাত এই আঁচনিৰ জৰিয়তে দৰিদ্ৰ লোকে যথেষ্ট সকাহ লাভ কৰিবলৈ সক্ষম হৈছিল । কিন্তু এই অঞ্চলটোৰ ৰাইজে অভাৱতে দিন অতিবাহিত কৰিবলগীয়া হয় । এতিয়া প্ৰশ্ন উত্থাপন হৈছে যে, কাৰ ভুলৰ বাবে এই দৰিদ্ৰ হিতাধিকাৰীসকলৰ খাদ্য সুৰক্ষা আইনৰ অধীনৰ ৰেচন কাৰ্ড থকাৰ পিছতো চৰকাৰী সকলো সা-সুবিধাৰ পৰা বঞ্চিত হ'বলগীয়া হৈছে । ৰাইজে শীঘ্ৰে সুলভ মূল্যৰ সামগ্ৰীসমূহ তেওঁলোকে লাভ কৰাৰ ব্যৱস্থা কৰি দিবলৈ চৰকাৰক আহ্বান জনাইছে ।
লগতে পঢ়ক:বিশ্বনাথত চাহ জনগোষ্ঠীয় ছাত্ৰ-ছাত্ৰীক ইউনিফৰ্ম আৰু চকীদাৰক চাইকেল প্ৰদান
