বকো, 7 ছেপ্টেম্বৰঃ শনিবাৰে বকোৰ ছমৰীয়া শংকৰদেৱ শিশু বিদ্যা নিকেতন বিদ্যালয়ৰ ছাত্ৰ-ছাত্ৰীৰ অভিভাৱক সহিতে একাংশ ৰাইজে বিদ্যালয়ৰ সন্মুখত প্ৰতিবাদ সাব্যস্ত কৰে৷ প্ৰতিবাদী ৰাইজ সকলে বিদ্যালয়খনৰ প্ৰধান আচাৰ্য আৰু বিদ্যালয় পৰিচালনা সমিতিৰ সভাপতিক তীব্ৰ সকীয়নি প্ৰদান কৰে৷
প্ৰতিবাদকাৰী সকলৰ অভিযোগ অনুসৰি বিগত 5 বছৰে বিদ্যালয়খনৰ প্ৰধান আচাৰ্য ধীৰাজ বায়ন আৰু সভাপতি তৰুণ কলিতাই বিদ্যালয়ত অভিভাৱকৰ সভা অনুষ্ঠিত নকৰাকৈ নিজ মইমতালিৰে বিদ্যালয়খন পৰিচালনা কৰি আহিছে৷ ইফালে দান-বৰঙনি আৰু ছাত্ৰ-ছাত্ৰীৰ মাচুল আদিকে ধৰি বিভিন্ন শিতানত সংগ্ৰহৃত প্ৰায় 1 কোটি টকা খেলিমেলি কৰাৰো অভিযোগ উত্থাপিত হৈছে তেওঁলোকৰ বিৰুদ্ধে৷ ইয়াৰোপৰিও তেওঁলোকে অভিযোগ কৰে যে অভিভাৱক সকলে এখন সধাৰণ সভা অনুষ্ঠিত কৰাৰ আহ্বান কৰি আহিছে যদিও প্ৰধান আচাৰ্য আৰু সভাপতিয়ে এই ক্ষেত্ৰত কোনো গুৰুত্ব প্ৰদান কৰা নাই ৷ সেয়ে ৰাইজে আজি বিভিন্ন প্ৰতিবাদী শ্ল'গান দি পৰিস্থিতি উত্তাল কৰি তোলে৷
