বকো, 30 নৱেম্বৰ: বিজেপি নেতৃত্বধীন পৰিৱৰ্তনকামী চৰকাৰখনে পৰিৱৰ্তনৰ শ্ল'গান দি শাসনভাৰ গ্ৰহণ কৰিলে ৷ কিন্তু এতিয়াও পৰিৱৰ্তনৰ মুখ নেদেখিলে বকো সমষ্টিৰ ৪৭ নং বামুনবড়ীৰ গাওঁ পঞ্চায়তৰ বেৰাভাঙাৰটাৰী গাঁৱত থকা বাঁহৰ দলং খনে ৷ এখন বাঁহৰ ভগা দলঙেৰে বিপজ্জনকভাৱে যাতায়ত অব্যাহত ৰাখিছে গাঁওবাসীয়ে ৷ শতাধিক পৰিয়ালে বসবাস কৰা গাঁওখনত স্কুলীয়া ছাত্ৰ-ছাত্ৰী, ৰোগীকে ধৰি সকলোৱে এই দলঙেৰেই যাতায়ত অব্যাহত ৰাখিছে ৷
দীৰ্ঘদিন ধৰি এই বৃহত্তৰ অঞ্চলৰ স্কুলীয়া ছাত্ৰ-ছাত্ৰীকে ধৰি অঞ্চলবাসীয়ে বিপদ সংকুলভাৱে যাতায়ত কৰিবলগীয়া হৈছে এই ভগা দলংখনেৰে ৷ জৰাৰ্জীণ অৱস্থাত থকা দলঙখন নিৰ্বাচন আহিলেই ৰাজনৈতিক দলৰ নেতাই নিৰ্মাণ কৰাৰ প্ৰতিশ্ৰুতি দিয়ে আৰু পাছত ফুটুকাৰ ফেনত পৰিণত হয় ৷ দলঙখনৰ জৰাৰ্জীণ অৱস্থাৰ বাবে ৰোগীক চিকিৎসালয়লৈ নিবৰ বাবে আহিব নোৱাৰে এম্বুলেঞ্চ ৷ প্ৰতি বছৰে ৰাইজে গাঁঠিৰ ধন ভাঙি যাতায়তৰ বাবে বাঁহৰ সাকো নিৰ্মাণেৰে যাতায়ত সুচল কৰি তোলে স্থানীয় ৰাইজে ৷ ইমানৰ পিছতো পঞ্চায়ত প্ৰতিনিধি, সাংসদ তথা বিধায়কে সমস্যাটোত কোনো গুৰুত্ব নিদিয়াত সমস্যাৰ সন্মুখীন হ'বলগীয়া হৈছে বৃহত্তৰ অঞ্চলবাসীয়ে।
