বাইহাটা, 11 জুলাই : কামৰূপ গ্ৰাম্য জিলাৰ বাইহাটা চাৰিআলি অঞ্চলত দিন হাজিৰা কৰি দুবেলা-দুসাজ খোৱা বনুৱাৰ দেহৰ ওপৰেদি বলেৰ’(Bolero car) চলাই হত্যাৰ চেষ্টা চলালে এজনে ৷ এজন উদণ্ড যুৱকে প্ৰায় কুৰিজন বনুৱাৰ দেহৰ ওপৰৰে এখন বলেৰ' বাহন চলাই নিয়াৰ অপচেষ্টা চলোৱাৰ এই ভয়ংকৰ কাণ্ড সংঘটিত হয় জালুকবাৰী সমষ্টি(Jalukbari LAC)ৰ অন্তৰ্গত ক্ষুদ্ৰপলহাত ৷ ১৫ নং ৰাষ্ট্ৰীয় ঘাইপথ(NH 15) আৰু গোগ সংযোগী গ্ৰাম্যপথ(rural road)ৰ পকীকৰণৰ কাম চলি থকাৰ মাজতে সেই পথৰে বাসিন্দা খৱিৰ আহমেদৰ দুই পুত্ৰ নিপু আহমেদ আৰু পাপু আহমেদে পুৰুষ-মহিলাৰ বনুৱাৰ দ'লটোক কাম বন্ধ কৰিবলৈ ধমক দিয়ে । কিন্তু ক'ভিড পৰিস্থিতিত নিজৰ বৃত্তি হেৰুৱাই এই কাম কৰি দুপইছা লাভ কৰা বনুৱা সকলে পেটৰ তাড়নাত এই যুৱকদ্বয়ৰ ভাবুকিত সেও নামানি কাম অব্যাহত ৰখাত কথাতে উন্মাদ হৈ পৰা ভ্ৰাতৃদ্বয় ৷
ইয়াৰে পাপু আহমেদ নামৰ ভাতৃজনে অন্যস্থানত ৰখাই থোৱা AS01BX0253 নম্বৰৰ ব'লেৰখন চলাই আনি বনুৱা সকলৰ ওপৰৰে চলাই নিয়াৰ অপচেষ্টাত লিপ্ত হয় । লগে-লগে বনুৱা সকলৰ মাজত আতংকৰ সৃ্ষ্টি হোৱাৰ লগতে তেওঁলোকে প্ৰাণৰক্ষাৰ বাবে দৌৰাদৌৰি কৰিব লগাত পৰে । তৎস্বত্বেও বলেৰ’খনৰ এটি চকা এজন বনুৱাৰ ভৰিৰ আঙুলি এটাৰ ওপৰৰে পাৰ হোৱাত আহত হয় বনুৱা গৰাকী । ইয়াৰ লগতে শিল চিটিকি পৰাৰ বাবেও বহুকেইজন বনুৱা সামান্যভাৱে আহত হয় । ইপিনে, পথত থকা শিলৰ দম এটিত খুণ্ডিয়াই ৰৈ যাবলৈ বাধ্য হয় বলেৰ’ বাহনখন ।
যুৱক দুজনৰ এই উপদ্ৰৱৰ খৱৰ পোৱাৰ লগেলগে স্থানীয় বহু সংখ্যক লোক ঘটনাস্থলীত উপস্থিত হোৱাত দুই ভাতৃয়ে ঘটনাস্থলীৰ পৰা পলায়ন কৰে । পথটোৰ কামৰ দায়িত্ব লাভ কৰা ঠিকাদাৰ জনক যুৱক দুজনে ৫ লাখ টকা দাবী কৰাৰো এক অভিযোগ উত্থাপিত হৈছে । বনুৱা সকলে ঠিকাদাৰৰ লগত হোৱা বাক বিতাণ্ডাত কোনো ধৰণৰ মতামত নিদিয়াৰ পিচতো গাড়ীৰে আক্ৰমণ কৰাৰ ঘটনাই অঞ্চলবাসী ৰাইজক ক্ষোভিত কৰিছে ৷
লগতে পঢ়ক : নিজৰ মাজতে সংঘৰ্ষ লাগি প্ৰাণ হেৰুৱালে বীৰাপ্পানে
