বকো, 22 ডিচেম্বৰ: এইয়া কমলা টেঙাৰ বতৰ ৷ শীতৰ সেমেকা বতৰৰ কোমল ৰ'দত বহি কমলাৰ সোৱাদ লোৱাৰ আমেজেই সুকীয়া ৷ থলুৱা আৰু আমদানিকৃত কমলাটেঙাই এতিয়া ভৰি পৰিছে ৰাজ্যৰ বজাৰসমূহ ৷ বজাৰত এতিয়া প্ৰতিটো কমলাৰে দাম ৭ টকাৰ পৰা দহ টকা পৰ্যন্ত ৷ কিন্তু ৰাজ্যত কমলা উৎপাদনৰ প্ৰচুৰ সম্ভাৱনা থকাৰ পিছতো চাহিদা অনুযায়ী উৎপাদন পৰা বঞ্চিত হৈছে কমলাৰ খেতিয়কসকল ৷ কমলা বাগানত এতিয়া দেখা দিছে অচিন ৰোগে ৷ সেয়েহে দেশৰ বিভিন্ন প্ৰান্তৰ পৰা অনা কমলাৰে ভৰি পৰিছে বজাৰসমূহ ৷
উল্লেখ্য যে, ৰাজ্যৰ বিভিন্ন প্ৰান্তৰ কমলাৰ পৰিৱৰ্তে দক্ষিণ কামৰূপৰ কমলাৰ সুৱাদেই এক সুকীয়া ৷ দক্ষিণ কামৰূপৰ উকীয়াম শান্তিপুৰ, কম্পাতলী, হাহিম, আমৰেংকোনা, আঠিয়াবাৰী আদি অঞ্চলসমূহত কমলা খেতিৰ বাবে উল্লেখনীয় ঠাই। কিন্তু ক্ৰমান্বয়ে দক্ষিণ কামৰূপৰ অসম মেঘালয় সীমান্তৱৰ্তী এলেকাসমূহত কমলাৰ উৎপাদন দিনক দিনে হ্ৰাস পাবলৈ ধৰিছে ৷ অভিযোগ অনুসৰি কমলা খেতিয়কে চৰকাৰ প্ৰশাসন কিম্বা কৃষি বিভাগৰ পৰা নাপায় কোনো বিশেষ সা-সুবিধা । কৃষি বিভাগৰ উদ্যান শস্য নামৰ এটা বিয়াগোম বিভাগ আছে যদিও তাৰ পৰা প্ৰকৃতাৰ্থত কোনো ধৰণে উপকৃত হোৱা নাই কৃষক সকল ৷
এতিয়া প্ৰশ্ন হয় কৃষি দপ্তৰৰ উদ্যান শস্য বিভাগৰ পৰা এনে কমলাৰ খেতিয়কে কিবা সাহাৰ্য্য পাবলৈ সক্ষম হ'ব নে ? চৰকাৰৰ কৃষি বিভাগৰ অৱহেলাৰ বাবেই দক্ষিণ কামৰূপৰ সুস্বাদু কমলা টেঙাৰ ব্যৱসায় চিৰ দিনৰ বাবে নিশেষ হ'ব নেকি!
