বৰুৱাজানীত উৎখাত দলিলৰ অবৈধ বেহাৰ ঘাটি

দলিলৰ অবৈধ বেহাৰ ঘাটি উৎখাতঃ আটক চাহিদা খাতুন নামৰ এগৰাকী মহিলাক

কামৰূপ, 28 মাৰ্চঃ কামৰূপৰ কমলপুৰ আৰক্ষী থানাৰ অন্তৰ্গত বৰুৱাজানীত দলিলৰ অবৈধ বেহাৰ এটা ঘাটি উৎখাত কৰে কমলপুৰ আৰক্ষীয়ে ৷ গোপন সূত্ৰৰ ভিত্তিত আৰক্ষীয়ে অভিযান চলাই উৎখাত কৰে দলিলৰ অবৈধ বেহাৰ ঘাটিটো ৷ লগতে ঘাটিটোৰ পাৰ আৰক্ষীয়ে জব্দ কৰে বৃহৎ পৰিমাণৰ ৰাজহ টিকট আৰু দলিল ৷ বৰুৱাজানীৰ চাফনুৰ আলী নামৰ এগৰাকী ব্যক্তিয়ে নিজ ব্যৱসায়িক প্ৰতিষ্ঠানত দীৰ্ঘদিন ধৰি চলাই আহিছিল দলিলৰ এই অবৈধ বেহা ৷

অঞ্চলটোৰ একাংশ সচেতন ৰাইজে কমলপুৰ ৰাজহ চক্ৰ বিষয়াক অভিযোগ প্ৰদান কৰাৰ পাচতে বিষয়াগৰাকীৰ নিৰ্দেশক্ৰমে চাফনুৰ আলী ব্যৱসায়িক প্ৰতিষ্ঠানত কমলপুৰ আৰক্ষীয়ে তালাচী চলাই দলিল আৰু বৃহৎ পৰিমাণৰ ষ্টাম্প পেপাৰ জব্দ কৰাৰ লগতে আটক কৰে চাফনুৰৰ পত্নী চাহিদা খাতুনক ৷ উল্লেখ্য যে, পেচাত শিক্ষকতা কৰা চাফনুৰৰ পত্নী চাহিদাই চোৱাচিতা কৰিছিল এই অবৈধ বেহা ৷ ইপিনে আৰক্ষীয়ে চাহিদা খাতুনক আটক কৰাৰ পাচতে আত্মাগোপন কৰে চাফনুৰ আলীয়ে ৷