বকো, ১৮ জুলাই: বৃহস্পতিবাৰে বকো বিধানসভা সমষ্টিৰ বিধায়িকা নন্দিতা দাসে অঞ্চলটোৰ বানাক্ৰান্তৰ দুৰৱস্থাৰ বুজ লয় । আৰিকাটি, গৰৈমাৰী বিলৰজান, পানীখাইটী, লটাৰীদিয়া, বৰদিয়া নয়াপাৰা, পল্লীমংগল, গৰুৰচৰ আদি গাঁৱৰ প্ৰায় পাঁচ হাজাৰ লোকে বিগত পাঁচ দিন ধৰি আৰিকাটি মথাউৰিত বাস কৰি আছে । বিধায়িকা গৰাকীয়ে এই বানাক্ৰান্ত লোক সমূহৰ দুৰৱস্থাৰ বুজ লোৱাৰ লগতে তেওঁলোকৰ মাজত বান সাহাৰ্য বিতৰণ কৰে ।
বান সাহাৰ্যত বিতৰণ কৰা সামগ্ৰী সমূহ ক্ৰমে চাউল, দাইল, মিঠাতেল, চিৰা, নিমখ, বিস্কুট, খোৱা পানীৰ বটল, ছয়টা দমকল, ব্লিচিং পাউদাৰ ইত্যাদি । সাংবাদিকৰ সৈতে মত বিনিময় কৰাৰ সময়ত বিধায়িকা নন্দিতা দাসে উদ্বেগ প্ৰকাশ কৰি কয় যে জিলা প্ৰশাসনে প্ৰায় দুই শতাধিক পৰিয়ালৰ গৰু, ছাগলী, ম’হ, ঘোৰা, ভেৰা ইত্যাদিৰ বাবে কেৱল ৬২ কুইন্টল চাপৰ আৰু কেৱল ৩০ খন ট্ৰিপাল দিয়ে দায়িত্ব সামৰিব খুজিছে । লগতে তেওঁ এই ক্ষেত্ৰত অসমৰ মুখ্যমন্ত্ৰীয়ে যাতে অতি শীঘ্ৰে খোৱা খাদ্য, পানী, মেডিকেল ইত্যাদিৰ ব্যৱস্থা কৰে তাৰ অনুৰোধ জনায় ।
