ৰঙিয়া, 4 ডিচেম্বৰ : ৰঙিয়াত আদৰ্শ খেতিয়ক হিচাপে পৰিগণিত হৈছে এগৰাকী বোৱাৰী (Lady Farmer in Rangia) । কিয়নো স্বামীৰ সৈতে সমানে খেতি পথাৰত নামি সকলোৰে দৃষ্টি আকৰ্ষণ কৰিবলৈ সক্ষম হৈছে ৰঙিয়াৰ গোসাই শৌলমাৰীৰ আদৰ্শ খেতিয়ক বোৱাৰীগৰাকীয়ে ৷ নাম উষা নাথ ।
কৃষি বিজ্ঞান কেন্দ্ৰৰ (Krishi Vigyan kendra) পৰা প্ৰশিক্ষণ গ্ৰহণ কৰি উষা নাথে কমবাইন হাৰভেচটাৰ (combine harvester machine) নামৰ অত্যাধুনিক বাহন চলাই সকলোৰে প্ৰশংসা বুটলিবলৈ সক্ষম হৈছে । অত্যাধুনিক বাহনখনৰ আছে তিনিটা বিশেষ ক্ষমতা । উষা নাথে নিয়ন্ত্ৰণ কৰা অত্যাধুনিক বাহনখনৰ দ্বাৰা খেতিপথাৰত এবাৰতে ধান কটা, মৰণা মৰা আৰু ধান জৰাৰ ক্ষমতা আছে ।
ঘৰৰ সকলো কাম কাজ কৰাৰ লগতে স্বামীৰ সৈতে খেতিপথাৰত এই বাহনখনেৰে ধানবোৰ কাটি স্বামীক সমানে সহায় কৰিছিল । দিনটোৰ অধিকাংশ সময়ে স্বামীৰ সৈতে ব্যস্ত থাকে উষা নাথে (Lady Farmer busy in Paddy Field) ৷ তাৰ পিছত গাঁওখনৰ লগতে ৰঙিয়াৰ বিভিন্ন অঞ্চলৰ ধান কাটিবলৈ লয় উষা নাথে । ফলত আৰ্থিকভাৱেও যথেষ্ট লাভাম্বিতও হৈছে ৰঙিয়াৰ কৃষক বোৱাৰীগৰাকীয়ে ৷
উল্লেখ্য যে, অত্যাধুনিক বাহনখনেৰে এদিনত প্ৰায় ১৫ বিঘা ধান কাটে উদ্যামী মহিলা উষা নাথে । কম সময়ৰ ভিতৰত আৰু এবাৰতে ধান কটা, মৰণা মৰা আৰু ধনবোৰ জৰাৰ বাবদ এবিঘা খেতিপথাৰৰ ধানৰ বাবদ সংগ্ৰহ কৰে প্ৰায় পোন্ধৰশ টকা । এগৰাকী বোৱাৰী হোৱাৰ পিছতো নিজে স্বাৱলম্বী হৈ এক আদৰ্শ দাঙি ধৰিবলৈ সক্ষম হৈছে উষা নাথে ।
লগতে পঢ়ক : জৈৱিক পদ্ধতিৰে কৃষিকৰ্ম কৰা এজন আদৰ্শ খেতিয়ক
