দক্ষিণ কামৰূপ, 17 আগষ্টঃ ২০১৯-২০ বৰ্ষৰ বাবে সাজু হৈছে ভ্ৰাম্যমাণ থিয়েটাৰৰ দলসমূহ । সমান্তৰালকৈ বৰ্ষটোৰ বাবে সাজু হৈ উঠিছে ইতিহাস থিয়েটাৰ । শুকুৰবাৰে নিশা আনুষ্ঠানিকভাৱে বৰ্ষটোৰ নাট্যযাত্ৰাৰ শুভাৰম্ভণি ঘটে ইতিহাস থিয়েটাৰৰ । দক্ষিণ কামৰূপৰ মিৰ্জাত বছৰটোৰ প্ৰথমখন নাটকৰ আৰম্ভণি ঘটে ইতিহাস থিয়েটাৰৰ । আনুষ্ঠানিক শুভাৰম্ভণি অনুষ্ঠানত বন্তি প্ৰজ্বলন কৰে জ্যেষ্ঠ সাংবাদিক নিতুমনি শইকীয়াই ৷ তাৰপিছতেই অসম সাহিত্য সভাৰ সভাপতি ড0 পৰমানন্দ ৰাজবংশীয়ে আনুষ্ঠানিকভাৱে মঞ্চৰ মুকলি কৰে ।
আনহাতে এই ভ্ৰাম্যমাণ জগতখন জীয়াই ৰখাৰ স্বাৰ্থত অসম সাহিত্য সভাই অসম চৰকাৰৰ সৈতে এক আলোচনাত মিলিত হৈ বিশেষ আচনিৰ কথা চিন্তা চৰ্চা কৰাৰ কথাও জানিবলৈ দিয়ে ৷ ইতিহাস থিয়েটাৰে এইবাৰ অভিজিত ভট্টাচাৰ্যৰ 'তেজে ধোৱা মানুহ',চম্পক শৰ্মাৰ 'দানৱ' আৰু ধ্ৰুৱ শৰ্মাৰ 'এই মোৰ শেষ গান' নামৰ তিনিখন নাটক অসমবাসী ৰাইজক উপহাৰ দিব । প্ৰথমটো পেণ্ডেলৰ প্ৰথমটো দৰ্শনীতে ৰাইজৰ সহাঁৰি দেখি অভিভূত হৈ পৰে অভিনেতা-অভিনেত্ৰীসকল । এইবৰ্ষৰ নাটসমূহত অভিনয় কৰিছে চম্পক শৰ্মা,অংকিতা শইকীয়া,ননী দেৱী,অঞ্জলী চেত্ৰী,জেফ্ৰী বক্সী,দুলাল শৰ্মাকে ধৰি কেইবাগৰাকীও অভিনেতা-অভিনেত্ৰীয়ে ।
