বাইহাটা, 31 মে’ : উৎকট গৰমে দহিছে ৰাজ্যবাসীক ৷ গৰমৰ পৰা পৰিত্ৰাণ পাবলৈ বিভিন্ন জুলীয়া পানীৰ সুৱাদ নিশ্চয় আপুনি লৈছে ৷ আনকি আপোনাৰ বাবে আপোনাৰ সন্তানটিৰ গৰম দিনৰ প্ৰিয় খাদ্য আইচ ক্ৰীম নেকি ?
তেন্তে এতিয়াৰে পৰা সাৱধান হওক ৷ পৰিহাৰ কৰক এই অভ্যাস । নতুবা আপুনি অথবা আপোনাৰ পৰিয়ালটো পৰিব পাৰে ভয়ংকৰ বিপদত । কিয়নো আজিৰ এই বাতৰিত এনে এটা আইচ ক্ৰীম কোম্পানীৰ কথা ক’ম, য’ত অতি নিম্নমানৰ আইচ ক্ৰীম প্ৰস্তুত কৰা হয় ৷
এই কোম্পানীটো আছে চাংসাৰিৰ এইমছৰ সমীপৱৰ্তী জালাহ গাঁৱৰ ৷ আপুনি নেদেখিলে হয়তো ধৰিবই নোৱাৰিব যে, নামী-দামী শ্ব’ ৰুমত থকা বিভিন্ন ব্ৰেণ্ডৰ আইচক্ৰীম এয়া (Ice cream prepared in very unhealthy environments) ৷ শৌচালয়ৰ সন্মুখত অতিকে দুৰ্গন্ধময় আৰু লেতেৰা পৰিৱেশত ৰখা হৈছে নামী-দামী বিভিন্ন ব্ৰেণ্ডৰ এই আইচক্ৰীমসমূহ ৷ চাৰিওকাষৰ পৰিৱেশৰ প্ৰতি যেন কোনো ভ্ৰূক্ষেপ নাই আইচক্ৰীম প্ৰস্তুতৰ্কতাসকলৰ ৷
ডাইলেণ্ড নামৰ কোম্পানীটোত তৈয়াৰ কৰা আইচক্ৰীম এয়া ৷ এই দৃশ্যই এতিয়া চকু কপালত তুলিছে সাধাৰণ লোকৰ ৷ একাংশ বহিৰাগত প্ৰতিষ্ঠানে এক অস্বাস্থ্যকৰ পৰিৱেশত এনেদৰেই আইচক্ৰীম তৈয়াৰ কৰি ৰাইজক খুৱাই আছে বৰবিহ ৷
চৰকাৰৰ বিয়াগোম খাদ্য সুৰক্ষা বিভাগৰ নীৰৱ ভূমিকাৰ সুযোগ লৈ জনস্বাস্থ্যৰ সৈতে হেতালি খেলিছে এইসমূহ কোম্পানীয়ে ৷ এইখিনিতে প্ৰশ্ন হয় কেনেদৰে এইসমূহ কোম্পানীয়ে লাভ কৰি আহিছে খাদ্য সুৰক্ষা বিভাগৰ (Food Safety Department) লাইচেঞ্চ ৷ সেয়াও হয়তো আজিৰ তাৰিখত এক গুৰুত্বপূৰ্ণ প্ৰশ্ন ৷ স্থানীয় ৰাইজে এই গুৰুত্বপূৰ্ণ বিষয়টোৰ সন্দৰ্ভত উচিত তদন্তৰ দাবী জনাইছে ৷
এই প্ৰতিবেদন পঢ়াৰ পাচত এতিয়া মাথো বিচাৰ আপোনাৰ ৷ উৎকট গৰমৰ পৰা পৰিত্ৰাণ পাবলৈ আপুনি এনেধৰণৰ বৰবিহ খাবনে ? পাৰিবনে সকলো জনাৰ পিছত বজাৰত সহজে উপলব্ধ এটি আইচক্ৰীম আপোনাৰ সন্তানৰ হাতত তুলি দিবলৈ ? নে এগৰাকী সচেতন অভিভাৱকৰ ভূমিকা গ্ৰহণ কৰি এনে অসাধু ব্যৱসায় বন্ধ কৰিবলৈ ওলাই আহিব ৷
লগতে পঢ়ক : কাঠপেঞ্চিলত বিভিন্ন ভাস্কৰ্য স্থাপনেৰে দৃষ্টি আকৰ্ষণ মহানগৰীৰ যুৱতীৰ
