গুৱাহাটী, 8 অক্টোবৰ : আৰক্ষীৰ জাননী লাভৰ পাছতেই শুকুৰবাৰে দিছপুৰ থানাত হাজিৰ হয় ডাঃ নভনীল বৰুৱা । ৰাজকন্যা বৰুৱাক ৰক্ষণাবেক্ষণ দিয়াৰ অভিযোগ উত্থাপন হৈছে ডাঃ নভনীল বৰুৱাৰ বিৰুদ্ধে ৷ নিশা সুৰামত্ত হৈ আঠজনকৈ শ্ৰমিকক গাড়ীৰে মহতীয়াই নিয়া ৰাজকন্যা বৰুৱাক অসুস্থতাৰ প্ৰমাণপত্র দি জি এন আৰ চিৰ আই চি ইউত ভৰ্তি কৰাৰ সুবিধা কৰি দিছিল ডাঃ নভনীল বৰুৱাই ৷
বুধবাৰে গুৱাহাটী চিকিৎসা মহাবিদ্যালয় হাস্পতালৰ মেডিকেল ব'ৰ্ডে ৰাজকন্যা বৰুৱা সুস্থ বুলি প্ৰমাণপত্ৰ দিয়াৰ পাছতেই সকলো কথা পোহৰলৈ আহে। ইতিমধ্যে ৰাজকন্যা বৰুৱাক আৰক্ষীয়ে গ্ৰেপ্তাৰ কৰি নিজৰ জিম্মাত ৰাখিছে । ৰাজকন্যা বৰুৱা অসুস্থ বুলি ভুৱা প্ৰমাণপত্ৰ দিয়া ডাঃ নভনীল বৰুৱাক বৃহস্পতিবাৰে দিছপুৰ আৰক্ষীয়ে চমন জাৰি কৰিছিল ।
সেই অনুসৰি শুকুৰবাৰে দিছপুৰ থানাত হাজিৰ হয় ডাঃ নভনীল বৰুৱা । দিছপুৰ থানা চৌহদত সংবাদ মাধ্যমৰ আগত তেওঁৰ বিৰুদ্ধে উত্থাপিত সকলো অভিযোগ খণ্ডন কৰি ডাঃ বৰুৱাই কয়- 'মই কাকো নিৰাপত্তা দিয়া নাই । মই একো ভুল কৰা নাই ।' তেওঁ আনকি ৰাজকন্যা বৰুৱাক চিনি নাপাও বুলিও সংবাদ মাধ্যমৰ আগত কয় । ৰাজকন্যা বৰুৱাক আই চি ইউত ৰখাৰ অভিযোগো নস্যাৎ কৰিছে ডাঃ নৱনীল বৰুৱাই ৷ ডাঃ বৰুৱাই কয় যে, ‘ৰাজকন্যাক আই চি ইউত মই ৰখা নাছিলোঁ।'
উল্লেখ্য যে, চিকিৎসক ডাঃ নভনীল বৰুৱাৰ লগতে জি এন আৰ চি হাস্পতালৰ অধীক্ষককো জেৰা কৰিছে দিছপুৰ আৰক্ষীয়ে ৷
লগতে পঢ়ক : এদিনৰ বাবে আৰক্ষীৰ জিম্মাত ৰাজকন্যা বৰুৱা; ডাঃ নভনীল বৰুৱাক চমন
