কলগাছিয়া, বাইহাটা চাৰিআলি, বটদ্ৰৱাঃ ৰাজ্য চৰকাৰে অসমত উন্নয়নৰ ধাক-ঢোল বজাই থকা সময়তে কলগাছিয়াৰ মইনবড়ীত বিপদসংকুল যাত্ৰা শ শ ছাত্ৰ ছাত্ৰীৰ ৷ চৰকাৰে পাৰঘাটৰ নাও বন্ধ কৰি দিয়াৰ পাচতো অঞ্চলটোৰ লোক সকলে অনুজ্ঞাপত্ৰ বিহীন ব্যক্তিগত নাৱত ভাড়া দি বিপদসংকুল ভাবে পাৰাপাৰ হয় বেঁকী নৈ ৷ অঞ্চলবাসীয়ে জনোৱা অনুসৰি নৈত খনত চৰকাৰীভাৱে পাৰাপাৰ ব্যৱস্থা নথকাৰ বাবে বহু সময়ত ছাত্ৰ-ছাত্ৰী সকলে সময় মতে বিদ্যালয়ত উপস্থিত হ'ব নোৱাৰি দৈনিক পাঠদানৰ পৰা বঞ্চিত হ'ব লগীয়া হয় ৷
উল্লেখ্য যে, কলগাছিয়া ৰাজহ চক্ৰ আৰু বাঘবৰ বিধান সভা সমষ্টিৰ অন্তৰ্গত পশ্চিম মইনবড়ী, কিচমত মইনবড়ী, দেউলদি, টাকাকাটা, ৰামাপাৰা, সত্ৰ মইনবড়ী, মৰাবাজ, হালধীয়াপাৰা আদি গাঁৱৰ পৰা দৈনিক শ শ ছাত্ৰ-ছাত্ৰীয়ে এইদৰে পাঁচ টকা কৈ ভাড়া দি ভুটভুটীৰে বিপদসংকুল ভাৱে যাত্ৰা কৰে ৷ সেয়ে শীঘ্ৰে ছাত্ৰ ছাত্ৰী আৰু ৰাইজৰ সুবিধাৰ্থে অঞ্চলবাসীয়ে বেঁকী নৈৰ ওপৰত এখন দলং নিৰ্মাণ কৰিবলৈ চৰকাৰক দাবী জনাইছে ৷
ইপিনে, বাইহাটা চাৰিআলিত আকৌ কংক্ৰিটৰ যুগত বাঁহৰ সাঁকোৰে বিপদ সংকুল যাত্ৰা অঞ্চলবাসীৰ ৷ বৰলেচাকোনা গাঁৱৰ চেঁচা নৈৰ ওপৰত বাঁহৰ সাঁকোৰে নৈ পাৰ কৰিছে স্কুলীয়া ছাত্ৰ ছাত্ৰীৰ লগতে সাধাৰণ পথচাৰীয়ে ৷ অঞ্চলটোৰ প্ৰায় 15 খন মান গাঁৱৰ মানুহে যাতায়ত কৰা এই পথটোৰ চেঁচা নৈৰ ওপৰত দলং খন নোহোৱাৰ ফলত অতিৰিক্ত বহু পথ ঘূৰি যাবলগীয়া হয় অঞ্চলবাসীয়ে ৷ ৰোগীক চিকিৎসালয়লৈ নিবৰ বাবে 108 সোমাব নোৱাৰা এই পথটোত চেঁচা নৈৰ ওপৰত থকা বাঁহৰ সাঁকোৰ সলনি এখন পকী দলং বিচাৰিছে স্থানীয় ৰাইজে ।
আনহাতে, বটদ্ৰৱাত চৰকাৰলৈ বাট নাচাই ৰাইজে নিজৰ গাঁঠিৰ ধনেৰে নিমাৰ্ণ কৰিলে বাঁহৰ দলং ৷ বটদ্ৰৱা উন্নয়ন খণ্ডৰ অন্তৰ্গত ধূপগুৰি গাঁও পঞ্চায়তৰ ভেৰভেৰি গাঁৱত পথৰ দুৰৱস্থাৰ বাবেই বছৰ বছৰ ধৰি গাঁওবাসীয়ে জীয়াতু ভুগি আহিছে ৷ ৰাইজৰ অভিযোগ অনুসৰি 2016/17 বিত্তীয় বৰ্ষৰ এম জি এনৰেগাৰ কামত মেৰামতিৰ বাবে পঞ্চায়ত প্ৰতিনিধিয়ে এই পথৰ ওপৰত আধাৰশিলা স্থাপন কৰিছিল ৷ কিন্তু আধাৰশিলা স্থাপন কৰাৰ পাচতো স্থগিত হৈ ৰ'ল পথ নিৰ্মাণৰ কাম ৷ এই ক্ষেত্ৰত বটদ্ৰৱা উন্নয়ন খণ্ডৰ অভিযন্তা তথা সমষ্টিটোৰ বিধায়িকা গৰাকীয়ে গুৰুত্ব প্ৰদান নকৰাৰ অভিযোগ ৰাইজৰ ৷ ইয়াকে লৈ সমষ্টিটোৰ বিধায়িকা আঙুৰলতা ডেকাৰ লগতে পঞ্চায়ত প্ৰতিনিধি গৰাকীৰ ওপৰতো ক্ষোভ গাঁওখনৰ ৰাইজৰ ৷ অৱশেষত ৰজাঘৰীয়ালৈ বাট নাচাই ৰাইজে নিজেই নিৰ্মাণ কৰিলে বাঁহৰ দলং ৷
লগতে চাওক : ইটিভি ভাৰতৰ বাতৰিৰ প্ৰভাৱ : মাজুলী গড়কাপ্তানি বিভাগৰ মিঠ্যাচাৰ ফাদিল
