ৰঙিয়া, ১২ মে': ক'ভিড চিকিৎসালয়ৰ পৰাই সন্ধানহীন হ'ল ৰঙিয়াৰ এজন ক'ভিড ৰোগী । হাজোৰ কলিতাকুছি চিকিৎসালয়ত সংঘটিত হৈছে এই চাঞ্চল্যকৰ ঘটনা । চিকিৎসালয়খনত চিকিৎসাধীন হৈ আছিল ৰঙিয়াৰ শৌলমাৰীৰ ৰবিন কলিতা নামৰ লোকজন ।
মঙলবাৰে পুৱাৰে পৰা সন্ধান নাই ৭৫ বছৰীয়া লোকজনৰ । পৰিয়ালৰ লোকৰ লগতে চিকিৎসালয় কৰ্তৃপক্ষই লোকজনক বিচাৰিছে যদিও কোনো সন্ধান উলিয়াব পৰা নাই । লোকজনৰ স্বাস্থ্যৰ অৱস্থাক লৈ এতিয়া চিন্তিত হৈ পৰিছে পৰিয়ালৰ লোক ।
কিয়নো, তেওঁ যদি চিকিৎসা গ্ৰহণ নকৰাকৈ থাকে, তেন্তে স্বাস্থ্যৰ অৱনতি ঘটাৰ সম্ভাৱনা আছে । ইফালে, কৰ'ণাত আক্ৰান্ত লোকজন হঠাতে চিকিৎসালয়ৰ পৰা নিৰুদ্দিষ্ট হোৱাত অঞ্চলটোৰ ৰাইজ আতংকিত হৈ পৰিছে । লোকজনৰ সংস্পৰ্শলৈ আহিলে আন লোকো সংক্ৰমিত হোৱাৰ আশংকা হৈছে স্থানীয় ৰাইজৰ ।
লগতে পঢ়ক:বিহালীত বাঘৰ আতংক
