আজাৰা,12 এপ্ৰিলঃ নিৰ্বাচনী প্ৰচাৰৰ মাজতেই অসমীয়ালৈ শব্দবান কুইন ওজাৰ ৷ কেন্দ্ৰত মোডীয়ে শাসনভাৰ পুনৰ দখল কৰিলেই নাগৰিকত্ব সংশোধনী বিধেয়ক গৃহীত হ'ব বুলি নিৰ্বাচনী প্ৰচাৰৰ মাজতেই উল্লেখ কৰে গুৱাহাটী লোকসভা সমষ্টিৰ বিজেপিৰ প্ৰাৰ্থীগৰাকীয়ে ৷
শুকুৰবাৰে দক্ষিণ কামৰূপৰ বিভিন্ন প্ৰান্তত নিৰ্বাচনী প্ৰচাৰ চলাবলৈ উপস্থিত হয় গুৱাহাটী লোকসভা সমষ্টিৰ বিজেপি প্ৰাৰ্থী কুইন ওজা ৷ পলাশবাৰী বিধানসভা সমষ্টিত উপস্থিত হৈ মোডীৰ জয়গান গাই দক্ষিণ কামৰূপবাসীক কেৱল বিজেপিত ভোটদান কৰিবলৈ আহ্বান জনাই কুইন ওজাই ৷
শিলচৰৰ জনসভাত বৃহস্পতিবাৰে প্ৰধানমন্ত্ৰী নৰেন্দ্ৰ মোডীয়ে নাগৰিকত্ব সংশোধনী বিধেয়ক গৃহীত কৰিবলৈ কোনো সুৰুঙা নাৰাখে বুলি কোৱা কথাতো হয়ভৰ প্ৰদান কৰে বিজেপি প্ৰাৰ্থীগৰাকীয়ে ৷ লোকসভা নিৰ্বাচন সুকলমে সম্পন্ন হোৱাৰ পাচতেই নাগৰিকত্ব সংশোধনী বিধেয়ক প্ৰসংগত বিশদভাৱে আলোচনা কৰা হ'ব বুলিও সাংবাদিকক জনাই কুইন ওজাই ৷ মোডীয়ে শাসনভাৰ পুনৰ দখল কৰাৰ পাচতেই নাগৰিকত্ব বিধেয়ক প্ৰণয়ন কৰা হ'ব বুলি দৃঢ়তাৰে প্ৰকাশ কৰে বিজেপিৰ প্ৰাৰ্থীগৰাকীয়ে ৷ অৱশ্যে অসমীয়াৰ স্বাৰ্থ কোনো কাৰণতে বিঘ্নিত হ'বলৈ নিদিয়ে বুলিও প্ৰকাশ কৰে বিজেপিৰ প্ৰাৰ্থীগৰাকীয়ে ৷
