ৰঙিয়া,1 জুনঃ এখন জৰাজীৰ্ণ চৰকাৰী চিকিৎসালয় । এশ এবুৰি সমস্যাৰে জৰ্জৰিত এই চিকিৎসালয়খন হৈছে ৰঙিয়া সমষ্টিৰ অন্তৰ্গত কাউৰবাহা খণ্ড প্ৰাথমিক স্বাস্থ্য কেন্দ্ৰ । এজাক বৰষুণ দিলেই পানীৰে ভৰি পৰে চিকিৎসালয়খনৰ ভিতৰত । ঔষধ-পাতি,নথি-পত্ৰ সকলো নষ্ট হোৱাৰ লগতে বিকল হৈ পৰে চিকিৎসালয় খনৰ বিভিন্ন যন্ত্ৰপাতিসমূহ।
বৰষুণৰ ফলত সকলো নথি পত্ৰ,লাগতিয়াল ফাইল নষ্ট হৈ গৈছে চিকিৎসালয়খনৰ । উপায়ন্তৰ হৈ ৰ'দত মেলি ভাল কৰিবলৈ যত্ন কৰিছে লাগতিয়াল নথি পত্ৰ সমূহ । বৃহত্তৰ অঞ্চলটোৰ একমাত্ৰ আশা ভৰষাৰ থলী চিকিৎসালয়খনৰ শোচনীয় অৱস্থাৰ বাবে নানান দুৰ্ভোগ ভুগিব লগা হৈছে সাধাৰণ ৰাইজে । বিভাগীয় কৰ্তৃপক্ষ অথবা ৰঙিয়া সমষ্টিৰ বিধায়ক তথা জলসিঞ্চন মন্ত্ৰী ভৱেশ কলিতাক এই সন্দৰ্ভত বাৰম্বাৰ জনোৱাৰ পিছতো গুৰুত্ব নিদিয়াৰ অভিযোগ উত্থাপন হৈছে। ৰাইজৰ সমস্যাক পিঠি দি মন্ত্ৰী ভৱেশ কলিতাই স্বাস্থ্যমন্ত্ৰীৰ লগত ৰাইজক নিজাববীয়াকৈ যোগাযোগ কৰিবলৈ আহ্বান জনায় দায়িত্ব সামৰাৰ গুৰুতৰ অভিযোগ তুলিছে সদৌ অসম কলিতা জনগোষ্ঠীৰ কেন্দ্ৰীয় সম্পাদক ভাস্কৰ কলিতাই।
লগতে পঢ়কঃপুনৰ আৰম্ভ মাজুলী আৰু নিমাতি ঘাটৰ মাজৰ ফেৰীসেৱা
