ৰঙিয়া,৩১ মে': সমগ্ৰ বিশ্বতে পালন কৰা হৈছে বিশ্ব ধঁপাত বিৰোধী দিৱস(World No Tobacco Day) । ৰঙিয়াতো ইণ্ডিয়ান ৰেডক্ৰছ ছ'চাইটিয়ে বিশ্ব ধঁপাত বিৰোধী দিৱসৰ লগত সঙ্গতি ৰাখি ধূলাবড়ীৰ এন আৰ একাডেমীত আয়োজন কৰে দন্ত পৰীক্ষা শিবিৰ আৰু এখন সজাগতা সভা(Awareness programme on occasion of World Anti-Tobacco Day) । ৰেডক্ৰছ ছ'চাইটিৰ ৰঙিয়া শাখাৰ উদ্যোগত আৰু ৰঙিয়াৰ ডেণ্টি কিউৰ প্লাছৰ সহযোগত অনুষ্ঠিত কৰা সজাগতা সভাত ধঁপাত সেৱনৰ অপকাৰিতাৰ ওপৰত কেইবাজনো বিশেষজ্ঞ চিকিৎসকে ছাত্র- ছাত্ৰীসকলক সুন্দৰ ভাৱে ব্যাখ্যা আগবঢ়াই ।
ধঁপাত সেৱনৰ বাবেই বহু লোকে কিছুমান জটিল ৰোগৰ সন্মুখীন হ’ব লাগে বুলিও উল্লেখ কৰে উপস্থিত চিকিৎসকে । মঙলবাৰে আয়োজিত এই শিবিৰটোত এন আৰ একাডেমিৰ প্ৰায় দুশৰো অধিক ছাত্র-ছাত্ৰীক দন্ত চিকিৎসা প্ৰদান কৰা হয় । লগতে বিদ্যালয়খনৰ ছাত্র-ছাত্ৰীক ঔষধ বিতৰণ কৰে ৰেডক্ৰছে ।
আনহাতে স্বেচ্ছাসেৱী সংগঠন প্ৰভাতী কিৰণৰ উদ্যোগত আৰু গুৱাহাটীৰ অপ্তিমাছ ক্লিনিকৰ সহযোগত ৰঙিয়াত এটা বিনামূলীয়া স্বাস্থ্য শিবিৰৰো আয়োজন কৰা হয় । অনগ্ৰসৰ এই অঞ্চলটোৰ দৰিদ্ৰ লোকসকলৰ কল্যাণাৰ্থে এই চিকিৎসা শিবিৰটোৰ আয়োজন কৰা হয় । ৩১ মে'ৰ ধঁপাত মুক্ত দিৱসৰ লগত সংগতি ৰাখি এই শিবিৰটোৰ জৰিয়তে ৰাইজৰ মাজত সজাগতা সৃষ্টিৰ প্ৰয়াস কৰা হয় ।
ডেৰ শতাধিক লোকক এই শিবিৰটোত বিনামূলীয়া চিকিৎসাৰ লগতে বিভিন্ন ৰোগৰ পৰীক্ষাৰ ব্যৱস্থা কৰা হয় । অপ্তিমাছ ক্লিনিকৰ বিশেষজ্ঞ চিকিৎসক ক্ৰমে ডাঃ মৃণ্ময় ভূঞা , স্নায়ু মনোৰোগ বিশেষজ্ঞ ডাঃ অশোক কুমাৰ, মেডিচিনৰ বিশেষজ্ঞ ডাঃ ৰুণজুণ টেৰংপি, ডঃ ৰাণী নাফিচা আৰু ডাঃ চেহনাজ হকৰ লগতে বহুকেইগৰাকী স্বাস্থ্যকৰ্মীয়ে ৰাইজক চিকিৎসা সেৱা আগবঢ়াই ।
ধঁপাতে কি দৰে মানুহৰ স্বাস্থ্য আৰু জীৱন ধ্বংস কৰে সেই বিষয়ে বিশেষজ্ঞ চিকিৎসকসকলে ৰাইজৰ মাজত সজাগতা সৃষ্টিৰ প্ৰয়াস কৰে । লগতে বৰ্তমান সময়ত দৈনিক বাঢ়ি অহা মানসিক ৰোগ আৰু ইয়াৰ নিৰাময়ৰ বিষয়েও ৰাইজৰ লগত মত বিনিময় কৰে । ভিতৰুৱা গ্ৰাম্যাঞ্চলত এনেদৰে বিনামূলীয়া চিকিৎসা তথা ৰক্ত পৰীক্ষা আৰু সজাগতা শিবিৰৰ আয়োজন কৰা বাবে স্থানীয় লোকসকলে স্বেচ্ছাসেৱী সংগঠন প্ৰভাতী কিৰণৰ লগতে অপ্তিমাছ ক্লিনিকৰ ভুঞসী প্ৰশংসা কৰে ।
লগতে পঢ়ক: ইটাখোলাত উচ্ছেদ অভিযান : উচ্ছেদ কৰিলে ৪৫টাকৈ ব্যৱসায়িক কেন্দ্ৰ
