ৰঙিয়া,9 অক্টোবৰ: ৰঙিয়াৰ বঙালীকুছিত ৰাষ্ট্ৰীয় ঘাইপথত শুকুৰবাৰে সংঘটিত হৈছে ট্ৰাক ডকাইতি কাণ্ড । ট্ৰাক চালক আৰু হেণ্ডিমেনক উপৰ্যুপৰি আক্ৰমণ কৰে এটা চাৰিজনীয়া ডকাইতৰ দলে ৷ লগতে ট্ৰাকখনৰ পৰা লুটি নিয়ে বৃহৎ পৰিমাণৰ ধন । ট্ৰাকৰ চকা ফুটাই এই ডকাইটি কাণ্ড সংঘটিত কৰে দলটোৱে । এই আক্ৰমণত গুৰুতৰভাৱে আহত হৈছে ট্ৰাকখনৰ চালক আগৰতলা নিৱাসী দীপক দাস ।
জানিব পৰা মতে,ডকাইতৰ দলটোৱে জাগীৰোডৰ পৰা কলিকতা অভিমুখী NL-01K-2874 নম্বৰৰ এখন চিমেণ্ট ভৰ্তি ট্ৰাকৰ চালক-হেণ্ডিমেনক ধন দাবী কৰাত তেওঁলোকে ধন দিবলৈ অমান্তি হৈছিল ৷ ইয়াৰ পাচতে ট্ৰাকখনৰ চালক-হেণ্ডিমেনক আক্ৰমণ কৰে অস্ত্ৰধাৰী ডকাইতৰ দলটোৱে ।
ঘটনাস্থলীত ৰঙিয়া আৰক্ষী উপস্থিত হৈ আহত চালকজনক ৰঙিয়া মহকুমা অসামৰিক চিকিৎসালয়ত ভৰ্তি কৰায় । উল্লেখ্য যে, ৰঙিয়াৰ 31 নং ৰাষ্ট্ৰীয় ঘাইপথত প্ৰায়ে নিশাৰ ভাগত ট্ৰাক ডকাইতি কাণ্ড সংঘটিত থকা বুলি স্থানীয় ৰাইজে জানিবলৈ দিয়ে ৷
লগতে পঢ়ক: কাছাৰত মৰেল পুলিচিং : নিৰ্মমভাৱে প্ৰহাৰ গাড়ী চালকক
