গুৱাহাটী,12 আগষ্ট : চন্দ্ৰপুৰত ডাম্পিং গ্ৰাউণ্ড প্ৰত্যাহাৰৰ দাবীত ডাম্পিং গ্ৰাউণ্ড বিৰোধী মঞ্চই অব্যাহত ৰাখিছে ধাৰাবাহিক প্ৰতিবাদ ৷ চন্দ্ৰপুৰত ডাম্পিং গ্ৰাউণ্ড প্ৰত্যাহাৰৰ সিদ্ধান্ত চাৰকাৰীভাৱে ঘোষণা নকৰা পৰ্যন্ত প্ৰতিবাদী কাৰ্যসূচী অব্যাহত ৰখাৰ সিদ্ধান্ত গ্ৰহণ কৰিছে ডাম্পিং গ্ৰাউণ্ড বিৰোধী মঞ্চই ৷ শীঘ্ৰে চন্দ্ৰপুৰ ডাম্পিং গ্ৰাউণ্ড স্থাপন কৰা সিদ্ধান্ত প্ৰত্যাহাৰ কৰাৰ দাবীত বৃহস্পতিবাৰৰ দিনৰ 11 বজাত চন্দ্ৰপুৰ তাপবিদ্যুৎ প্ৰকল্প এলেকাত থকা পাৱাৰ গ্ৰীড ঘেৰাও কৰে ডাম্পিং গ্ৰাউণ্ড বিৰোধী মঞ্চৰ সদস্য সকলে ৷
প্ৰতিবাদকাৰীসকলে পাৱাৰ গ্ৰীডৰ ভিতৰত প্ৰৱেশৰ চেষ্টা কৰে যদিও আৰক্ষী প্ৰশাসনে বাধা প্ৰদান কৰে ৷ আৰক্ষী আৰু অসম ইলেকট্ৰিচিটি গ্ৰিড কৰ্পোৰেচন লিমিটেড(AEGCL)কৰ্তৃপক্ষই বৃহৎ বেৰিগেট লগাই প্ৰতিবাদকাৰীক বাধা প্ৰদানৰ চেষ্টা কৰে ৷ ইয়াৰ পিছতেই প্ৰতিবাদকাৰী সকলে চন্দ্ৰপুৰ তাপবিদ্যুৎ প্ৰকল্প চৌহদত প্ৰৱেশ কৰা গেটৰ সন্মুখত অৱস্থান কৰি দিনৰ 2 বজালৈ প্ৰতিবাদ সাব্যস্ত কৰে ৷
লগতে দিনৰ 2 বজাত ডাম্পিং গ্ৰাউণ্ড বিৰোধী মঞ্চই AEGCL ৰ বিষয়াৰ জৰিয়তে অসম পাৱাৰ জেনেৰেচন কৰ্পোৰেচন লিমিটেড (APGCL) কৰ্তৃপক্ষক এখন স্মাৰক পত্ৰ প্ৰেৰণ কৰে ৷
উক্ত স্মাৰক পত্ৰ খনত অহা 25 আগষ্টৰ ভিতৰত APGCL কৰ্তৃপক্ষই পৌৰ নিগমক প্ৰদান কৰা 40 বিঘা ভূমি বাতিল কৰিবলৈ দাবী উত্থাপন কৰে ৷ অন্যথা ৰাইজে বৃহৎ প্ৰতিবাদ সাব্যস্ত কৰিবলৈ বাধ্য হ'ব বুলিও সকীয়াই দিয়ে ৷ উল্লেখ্য যে, বিগত ডেৰ মাহৰো অধিক দিন ধৰি চন্দ্ৰপুৰত ডাম্পিং গ্ৰাউণ্ড স্থাপনৰ বিৰুদ্ধে চন্দ্ৰপুৰ বাসী ৰাইজে প্ৰতিবাদী কাৰ্যসূচী অব্যাহত ৰাখিছে ৷
লগতে পঢ়কঃ ৰাজহুৱা খেলপথাৰ নিৰ্মাণৰ বাবে ওলাই আহিল দিখৌমুখৰ ৰাইজ
