বাইহাটা, 24 জুনঃ বাইহাটা চাৰিআলিৰ অন্তৰ্গত কমলপুৰত আত্মহত্যা এগৰাকী অংগনবাদী কৰ্মীৰ ৷ উদ্ধাৰ হৈছে আত্মহত্যা কৰা মহিলা গৰাকীয়ে লিখি থৈ যোৱা এখন ছুইচাইড নোট ৷ য'ত স্পষ্টভাৱে উল্লেখ আছে কেইগৰাকীমান লোকৰ বিৰুদ্ধে কৰা অভিযোগ ৷ নোটখনত উল্লেখ থকাৰ লগতে পৰিয়ালৰ লোকে উল্লেখ কৰা অনুসৰি, ভিন্ন সময়ত মানসিকভাৱে তেওঁ নিৰ্যাতনৰ বলি হৈ আছিল সেই লোককেইজনৰ পৰা ৷ যাৰ বাবে কিৰণ শালৈ নামৰ অংগনবাদী কৰ্মী গৰাকীয়ে আত্মহত্যাৰ দৰে পথ বাছি ল'বলগীয়া হয় ৷
মহিলাগৰাকীৰ স্বামীয়ে উল্লেখ কৰা অনুসৰি, কেইগৰাকীমান লোকে মহিলাগাকীয়ে কামত অনিয়ম কৰা বুলি অপবাদ দিছিল এখন ৰাজহুৱা সভাত ৷ কিন্তু নিজৰ পক্ষত কোনো কথা ক'বলৈ সুবিধা নিদিয়াৰ বাবে কিৰণ শালৈ নামৰ মহিলা গৰাকীয়ে মানসিক ভাৰসাম্যতা হেৰুৱাই এনে পথ বাছি লয় ৷ দুটাকৈ সন্তান থকা মহিলা গৰাকীৰ মৃত্যুত এতিয়া দিকবিদিক হেৰুৱাই পেলাইছে তেওঁৰ স্বামীৰ লগতে পৰিয়ালটোৱে ৷ সমগ্ৰ বিষয়ত তদন্ত অব্যাহত ৰাখিছে আৰক্ষী প্ৰশাসনে ৷
লগতে পঢ়কঃ বিতৰ্কৰ আৱৰ্তত হেৰিটেজ জয়সাগৰ
