গুৱাহাটী,১৩ ফেব্ৰুৱাৰী : গুৱাহাটীৰ বামুণীমৈদামত জনপ্ৰিয় ইউটিউবাৰ প্ৰিয়লীনা নাথৰ ৰহস্যজনক মৃত্যুক কেন্দ্ৰ কৰি অব্যাহত আছে চাঞ্চল্য (Youtuber Priyaleena death)। শনিবাৰে পুৱতি নিশা অনুৰাধা ছবিগৃহৰ সমীপৰ অৰুণাচাল পথৰ এটা ঘৰৰ কোঠাত ডিঙিত চিপ লোৱা অৱস্থাত উদ্ধাৰ হৈছিল ইউটিউবাৰগৰাকীৰ মৃতদেহ । তাৰ পাচতে ইউটিউবাৰগৰাকীৰ মৃত্যুক লৈ বিভিন্ন ধৰণৰ সন্দেহ প্ৰকাশ কৰিছিল মৃত প্ৰিয়লীনাৰ পৰিয়ালে ।
আনকি জনপ্ৰিয় ইউটিউবাৰগৰাকীক স্বামী গৃহৰ পৰিয়ালে পৰিকল্পিতভাৱে হত্যা কৰাৰ অভিযোগ তুলি পৰিয়ালৰ লোকসকলে দেওবাৰে ঘটনা সন্দৰ্ভত চানমাৰি আৰক্ষী থানাত এখন এজাহাৰো দাখিল কৰিছিল । থানাত ৰজু হোৱা গোচৰৰ ভিত্তিত প্ৰিয়লীনাৰ স্বামী পংকজ নাথক ইতিমধ্যে চানমাৰি আৰক্ষীয়ে আটক কৰিছে যদিও প্ৰিয়লীনাৰ মৃত্যুৰ প্ৰকৃত ৰহস্য এতিয়াও পোহৰলৈ অহা নাই (Police arrests husband of Youtuber Priyaleena)।
প্ৰিয়লীনা নাথৰ পৰিয়ালে অভিযোগ কৰা অনুসৰি ইউটিউবাৰগৰাকীৰ দেহত আছিল কেইবাটাও আঘাতৰ দাগ । যাৰ বাবে স্বামী গৃহৰ পৰিয়ালে প্ৰিয়লীনাক হত্যা কৰা বুলি সন্দেহ প্ৰকাশ কৰিছে মাতৃৰ পৰিয়ালে । অৱশ্যে আৰক্ষীৰ সঠিক তদন্ত আৰু মৰণোত্তৰ পৰীক্ষাৰ প্ৰতিবেদনৰ পাছত হে পোহৰলৈ আহিব প্ৰিয়লীনাক প্ৰকৃততে হত্যা কৰা হৈছে নে আত্মহত্যা কৰিছে (Youtuber suicide case in Guwahati)।
উল্লেখ্য যে, দুদিন পূৰ্বে বামুণীমৈদামৰ স্বামীগৃহৰ ভাৰাতীয়া ঘৰত ডিঙিত চিপ লোৱা অৱস্থাত জনপ্ৰিয় ইউটিউবাৰ চাংগি ব্ল'গাৰ খ্যাত প্ৰিয়লীনা নাথৰ মৃতদেহ উদ্ধাৰ হৈছিল । কিন্তু ৰহস্যজনকভাৱে আৰক্ষীক খবৰ নিদিয়াকৈয়ে ইউটিউবাৰগৰাকীৰ ডিঙিৰ পৰা চিপ খুলি দিছিল স্বামী গৃহৰ পৰিয়ালে (YouTuber Priyaleenas mysterious death)।
প্ৰিয়লীনাৰ পৰিয়ালে কৰা আন এক অভিযোগ অনুসৰি তেওঁৰ মৃত্যুৰ খবৰ গাপ দিয়াৰ বাবে মৰণোত্তৰ পৰীক্ষা সম্পাদন কৰি সৎকাৰ কৰিবলৈ যোৱাৰ সময়ত হে প্ৰিয়লীনা নাথৰ পৰিয়ালক খবৰ দিয়া হৈছিল । ইফালে দেওবাৰে নৱগ্ৰহ শ্মশানত সৎকাৰৰ দিনা এই ঘটনাক কেন্দ্ৰ কৰি দুয়োটা পৰিয়ালৰ মাজত তীব্ৰ বাক-বিতণ্ডাৰো সৃষ্টি হয় ।
উল্লেখ্য যে, প্ৰায় ৬ মাহ পূৰ্বে পংকজে ইনষ্টাগ্ৰামত বঙাইগাঁও ষ্টেচনৰ সমীপৰ ইউটিউবাৰ প্ৰিয়লীনা নাথৰ সৈতে চিনাকি হৈছিল । তাৰ পাছত দুয়োজনৰ মাজত প্ৰেমৰ সম্পৰ্ক গঢ়ি উঠে । দীৰ্ঘদিনীয়া প্ৰেমৰ সম্পৰ্কক উপযুক্ত মান্যতা প্ৰদান কৰাৰ বাবে তিনি মাহ পূৰ্বে জামুগুৰিহাটৰ পংকজ নাথৰ সৈতে ক'ৰ্ট মেৰিজ কৰিছিল জনপ্ৰিয় ইউটিউবাৰ চাংগি ব্ল'গাৰ প্ৰিয়লীনা নাথে (Sanggi Vloger death)।
সেই দিন ধৰি দুয়ো একেলগে আছিল । জানিব পৰা মতে পেছাত এগৰাকী ব্যৱসায়ী পংকজ নাথৰ বামুণীমৈদামৰ অনুৰাধা ছবিগৃহৰ সন্মুখত আছে এখন ফাৰ্মাচী । কিন্তু কি কাৰণত কি পৰিস্থিতিত প্ৰিয়লীনাৰ দৰে এগৰাকী জনপ্ৰিয় ইউটিউবাৰে আত্মহত্যা কৰিবলৈ বাধ্য হ'ল সেয়াও এতিয়া ডাঙৰ ৰহস্য ।
লগতে পঢ়ক :Miscreants set fire in Amguri:আমগুৰিত নিশা দুৰ্বৃত্তই জ্বলালে আচবাব
