নিউজ ডেস্ক, 22 জুলাই : ৰাজ্যত মুখ্যমন্ত্ৰী ড৹ হিমন্ত বিশ্ব শৰ্মা নেতৃত্বাধীন বিজেপি চৰকাৰ শাসনলৈ অহাৰ পিছতেই শান্তি আলোচনাৰ এক সৌহাদ্যপূৰ্ণ পদক্ষেপ হিচাপে সংযুক্ত মুক্তি বাহিনী অসমে(united liberation front of Assam) যুদ্ধ বিৰতি(ceasefire) ঘোষণা কৰিছিল ৷ চলিত বৰ্ষৰ 15 মে’ তাৰিখৰ পৰা নিষিদ্ধ ঘোষিত সংগঠনটোৱে এই যুদ্ধ বিৰতিৰ পক্ৰিয়াত অটল হৈ আছে ৷ এই পক্ৰিয়াৰ অংশ স্বৰূপে সংগঠনটোৱে বৰ্তমান পৰ্যন্ত হিংসাত্মক কাৰ্যসূচী তথা ধন সংগ্ৰহৰ পৰা বিৰত হৈ আছে ৷
কিন্তু, বৃহস্পতিবাৰে সংগঠনটোৱে এক বিবৃতি যোগে জানিবলৈ দিছে যে, আলফাৰ নাম লৈ এচাম দুষ্ট চক্ৰই ধন সংগ্ৰহ অভিযান চলাই আছে ৷ এই প্ৰক্ৰিয়াৰ জৰিয়তে জনমানসত আলফাৰ ভাৱমূৰ্তি ম্লান কৰাৰ অপচেষ্টা চলা বুলি দাবী উত্থাপন কৰিছে সংগঠনটোৱে ৷ আলফাৰ মুখ্য সেনাধ্যক্ষ পৰেশ বৰুৱাৰ নাম লৈ দুষ্ট চক্ৰই এই কাৰ্য চলাই থকাৰ কথা সংগঠনটোৰ অৱগত হৈছে বুলিও উল্লেখ আছে বিবৃতিটোত ৷
চেম্বাৰ্চ অৱ কমাৰ্চ(chambers of commerce) নামৰ এক প্ৰতিষ্ঠান খুলি সংগঠনটোৰ মুখ্য সেনাধ্যক্ষ গৰাকীৰ নামত দুষ্ট চক্ৰটোৱে এই কাৰ্য সমাপন কৰি আছে ৷
এই কাৰ্যৰ সৈতে এচাম অসাধু আৰক্ষী বিষয়া তথা ব্যৱসায়ী জড়িত থকা বুলি দাবী কৰিছে আলফাই ৷ অনা অসমীয়া ব্যৱসায়ী কিম্বা ব্যৱসায়িক প্ৰতিষ্ঠানৰ পৰা এই দৰে এচাম অসাধু আৰক্ষী বিষয়া তথা ব্যৱসায়ীয়ে ধন সংগ্ৰহ কৰি বিদ্ৰোহী সংগঠনটোৰ ভাৱমূৰ্তি ম্লান কৰা কাৰ্যত ক্ষোভিত হৈ পৰিছে বিদ্ৰোহী সংগঠনটো ৷ ইয়াৰ লগতে, এই কাৰ্য বন্ধ নহ’লে ভয়াৱহ শাস্তি প্ৰদানৰ ভাবুকিও বিবৃতি যোগে প্ৰেৰণ কৰিছে নিষিদ্ধ ঘোষিত সংগঠনটোৱে ৷
লগতে পঢ়ক : আত্মসমৰ্পণৰ সম্ভাৱনা এন এল এফ বিৰ মুৰব্বী এম বাথাৰ
