1 বজাৰ শীৰ্ষ দহটা বাতৰি

1 বজাৰ শীৰ্ষ দহটা বাতৰি

সোমবাৰে পুৱা বকো নৈত উদ্ধাৰ হৈছে এটা মৃতদেহ ৷ মৃতদেহটো মেধিপাৰা গাঁৱৰ দেৱেশ্বৰ দাস নামৰ ব্যক্তিগৰাকীৰ বুলি জানিব পৰা গৈছে ৷ বকো নৈত মৃতদেহটো ওপঙি থকা প্ৰত্যক্ষ কৰি স্থানীয় ৰাইজে খবৰ দিয়ে আৰক্ষীক ।

বঙাইগাঁও জিলাৰ অভয়াপুৰীৰ উত্তৰ বিধানসভা সমষ্টিৰ মাজেৰে বৈ যোৱা আই নৈৰ বাঢ়নী পানীয়ে প্লাৱিত কৰিছে বহুসংখ্যক গাঁও । গৰাখহনীয়াত গৃহহাৰা হৈছে ৩০ টাৰো অধিক পৰিয়াল । বানপানীয়ে প্লাবিত কৰিছে কাছেৰীপেটী, আমবাড়ি, বাৰেগড় আদি গাঁও । আশ্ৰয়ৰ বাবে ওখ ঠাই বিছাৰি হাবাথুৰি খাইছে ক্ষতিগ্ৰস্ত লোকসকলে ।

কলিয়াবৰত নিশা বন্ধুৰ সৈতে ভৰ লুইতত মাছ মাৰিবলৈ গৈ নিখোজ হৈ থকা দীপক শইকীয়া নামৰ যুৱক গৰাকীৰ নিথৰ দেহ উদ্ধাৰ । দেওবাৰে 5 ঘন্টাজোৰা অভিযানৰ অন্তত সন্ধিয়া এচ ডি আৰ এফ বাহিনীয়ে উদ্ধাৰ কৰে যুৱক জনৰ মৃতদেহ ।

মুৱামাৰী প্ৰথম খণ্ড আৰু দ্বিতীয় খণ্ড গাঁৱৰ যোগাযোগৰ একমাত্ৰ সূত্ৰ গদাধৰ নৈৰ ওপৰত থকা দলঙখন পোন্ধৰ বছৰ পূৰ্বে ভাঙি যায় ৷ কিন্তু জনপ্ৰতিনিধি আৰু প্ৰশাসনৰ অবহেলাৰ বাবে গদাধৰ নৈৰ ওপৰত আজিপৰ্যন্ত নিৰ্মাণ নহ’ল দলং ৷

পশুধনৰ বাবে খাদ্য সংগ্ৰহ কৰিবলৈ গৈ মৃত্যুমুখত পৰে গোলাঘাটৰ এগৰাকী 28 বছৰীয়া যুৱক ৷ ব্ৰহ্মপুত্ৰৰ বাঢ়নী পানীত পৰি মদেশ্বৰ দলে নামৰ যুৱকগৰাকীৰ মৃত্যু হয় ৷ উক্ত ঘটনাটো সংঘটিত হৈছে মহুৰামুখৰ বংকুৱালত ৷

বছৰৰ দ্বিতীয়টো বানৰ কবলত বিশ্ব ঐতিহ্য ক্ষেত্র কাজিৰঙা ৰাষ্ট্রীয় উদ্যান । ইতিমধ্যে ব্রহ্মপুত্রৰ বাঢ়নী পানীয়ে কাজিৰঙা ৰাষ্ট্রীয় উদ্যানৰ প্রায় ৮০ শতাংশ এলেকা প্লাৱিত কৰিছে ৷

বৰপেটা জিলাৰ 487 গৰাকী বানাক্ৰান্তক উদ্ধাৰ NDRF বাহিনীৰ ৷ দলটোৱে বানাক্ৰান্ত ৰাইজক কোভিড-19ৰ পৰা ৰক্ষা কৰিবলৈ মাস্ক বিতৰণ কৰাৰ লগতে সামাজিক দূৰত্ব বজাই ৰাখি আৰু স্বাৱ পৰীক্ষাৰো ব্যৱস্থা কৰে ৷ বৰ্তমান 33খন জিলাৰ 24 খন জিলাই বানৰ কৱলত৷ বানৰ ফলত 8.03 লাখ পোহনীয়া জন্তুৰ মৃত্যু ৷

জাগীৰোড বিধান সভা সমষ্টিৰ পাত্ৰবড়ী পকী পথৰ পৰা শলমাৰীৰ আঙুলিকাটা পথাৰলৈকে পথ নিৰ্মানৰ বাবদ তিৱা স্বায়ত্ব পৰিষদৰ পৰা পাঁচ লাখ টকাৰ উন্নয়নৰ আঁচনি ঘোষণা কৰা হৈছিল ৷ কিন্তু নিৰ্মানৰ পিছতেই চপৰা-চপৰে খহিছে পঁকী পথ ৷

ধুবুৰীত বিপদ সীমাৰ ওপৰেৰে বৈছে গংগাধৰ নৈৰ বাঢ়নী পানী । গংগাধৰ নৈৰ কাষতেই থকা গোলকগঞ্জৰ কুমাৰগঞ্জ অঞ্চলৰ ৰোড কাম বান্ধ অৰ্থাৎ মথাউৰীয়ে অঞ্চলবাসীলৈ আনিছে চৰম ভাবুকি । যাৰ বাবে সোমবাৰে পুৱা ঘটনাস্থলীত উপস্থিত হৈ মথাউৰী পৰিদৰ্শন কৰে স্থানীয় বিধায়ক অশ্বিনী ৰায় চৰকাৰে ৷

উত্তৰ প্ৰদেশ চৰকাৰে ৰাজ্যখনত 10 জুলাই নিশা 10 বজাৰ পৰা 13 জুলাই পুৱা 5 বজালৈ লক ডাউন ঘোষণা কৰিছিল ৷ দেওবাৰৰ দিনটোত মুঠ 24খন এফআইআৰ ৰুজু কৰা হৈছে ৷ 64 গৰাকী লোকক প্ৰতিবন্ধকতাসমূহ উলংঘন কৰাৰ বাবে আটক কৰাৰ লগতে 1904 খন বাহন জব্দ কৰা হৈছে ৷