সন্ধিয়া সাত বজাৰ শীৰ্ষ দহ বাতৰি...

সন্ধিয়া সাত বজাৰ শীৰ্ষ দহ বাতৰি...

পাঠশালাৰ ডুমুৰীয়া গাঁও পঞ্চায়ত কাণ্ডত জড়িত ব্যক্তিৰ শাস্তিৰ দাবীত তিনিদিনীয়া কৰ্মবিৰতি পালন পঞ্চায়ত সচিবসকলৰ ৷ 24 ঘণ্টাৰ ভিতৰত আৰক্ষীয়ে দোষীক কৰায়ত্ত কৰিব নোৱাৰে তেন্তে 4 চেপ্তেম্বৰৰ দিনৰ 10 বজাৰ পৰা বিয়লি 3 বজালৈ দিনযোৰা কাৰ্যসূচীৰে জিলা পৰিষদৰ সন্মুখত অৱস্থান ধৰ্মঘট কাৰ্যসূচী পালন কৰিব পঞ্চায়তৰ সচিবসকলে ৷

মালিগাঁওস্থিত ডনবস্ক' কৰ্তৃপক্ষৰ বিৰুদ্ধে উত্তাল হৈ পৰে মালিগাঁৱৰ একাংশ ৰাইজ ৷ এগৰাকী লোকক তেওঁৰ লগতে আন লোককো হিন্দু ধৰ্মৰ পৰা খ্ৰীষ্টিয়ান ধৰ্মলৈ ধৰ্মান্তকৰণ কৰিবলৈ হেঁচা প্ৰদান কৰাৰ অভিযোগ উত্থাপন হৈছে ডনবস্ক' কৰ্তৃপক্ষৰ বিৰুদ্ধে ৷

দেৰগাঁৱত ডকাইতি । নিশা ব্যৱসায়িক প্ৰতিষ্ঠানত প্ৰৱেশ কৰি স্বত্বধিকাৰীক চোকা অস্ত্ৰৰে আক্ৰমণ কৰি লুটি নিলে ধন ৷ দেৰগাঁও আৰক্ষী থানাৰ পৰা মাত্ৰ 500 মিটাৰ নিলগত সংঘটিত এই ঘটনা ৷

নিকাছিৰ লক্ষীপুৰ এ ব্লক গাঁৱৰ সন্তোষ ৰামছিয়াৰীৰ পত্নী ভানুমতী ৰামছিয়াৰীৰ বুধবাৰে মৃত্যু ঘটে ৷ মহিলাগৰাকীক স্বামীয়ে বিবাহৰ পিছৰ পৰাই শাৰিৰীকভাৱে নিৰ্যাতন চলাই আহিছিল বুলি প্ৰতিৱেশীয়ে প্ৰকাশ কৰিছে ৷

কাৰ্বি আংলং-নাগালেণ্ড সীমান্তত জব্দ ড্ৰাগছ ৷ দুজনক আটক ৷ বিগত ছমাহত বোকাজানত জব্দ হৈছে প্ৰায় ২ কেজি ৫০০ গ্ৰাম ব্ৰাউন চুগাৰ যাৰ আন্তঃৰাষ্ট্ৰীয় বজাৰ মূল্য ১৭ কোটিৰো অধিক।

বঙাইগাঁৱত অব্যাহত আছে দুলনী নৈৰ গৰাখহনীয়া ৷ নদীৰ বুকুত জাহ গৈছে বহু কৃষিভূমি ৷ ৰাইজৰ তীব্ৰ প্ৰতিবাদ ৷ খহনীয়া ৰোধৰ বাবে চৰকাৰক ব্যবস্থা ল'বলৈ অনুৰোধ জনাইছে ৰাইজে ৷

মঙলদৈ অসামৰিক চিকিৎসালয়ত ভয়ংকৰ ঘটনা ৷ প্ৰায় চাৰি ঘণ্টা ধৰি চিকিৎসালয়ৰ বাহিৰত উন্মুক্ত অৱস্থাত পৰি ৰয় ক’ভিডত আক্ৰান্ত হৈ মৃত্যু হোৱা লোকৰ মৃতদেহ । চিকিৎসালয়ত উন্মক্ত অৱস্থাত ক’ভিড আক্ৰান্ত হৈ মৃত্যু হোৱা ব্যক্তিগৰাকীৰ মৃতদেহটোৰ কাষত প্ৰশাসনৰ কোনো লোক উপস্থিত নথকাত বহুলোক মৃতকৰ ওচৰতে থকা পৰিলক্ষিত হয় ।

কাকপথাৰত আধাৰ কাৰ্ডৰ নামত গ্ৰাহকৰ পৰা ধন সংগ্ৰহৰ অভিযোগ ৷ টকা নিদিলে আধাৰ কাৰ্ড বনাই নিদিয়াৰ অভিযোগ গ্ৰাহকৰ ৷

এপল মিল পুনৰ উজ্জীৱিত কৰাৰ দাবীত বৃহস্পতিবাৰে ৰঙিয়া-ভূটান সংযোগী আন্তঃৰাষ্ট্ৰীয় ঘাইপথ অৱৰোধ কৰে এপল শ্ৰমিক সন্থাৰ লগতে বৈদ‍্যগড় আঞ্চলিক ছাত্ৰ সন্থাই । লগতে বিধানসভাত চলি থকা বৰ্ষাকালীন অধিৱেশনত বিধায়ক ভৱেশ কলিতাই এপল মিলৰ বিষয়টো উপস্থাপন নকৰাত ক্ষোভ উজাৰে প্ৰতিবাদকাৰীসকলে ।

গুৱাহাটী বিশ্ববিদ্যালয়ত শিক্ষাৰ্থীৰ প্ৰতিবাদ ৷ বি.এডৰ চূডান্ত বৰ্ষৰ শিক্ষাৰ্থী সকলে সাব্যস্ত কৰে প্ৰতিবাদ ৷ 30 ছেপ্তেম্বৰৰ ভিতৰত পৰীক্ষাৰ ফলাফল ঘোষণা কৰাৰ দাবী শিক্ষাৰ্থীৰ ৷