সন্ধিয়া 5 বজাৰ শীৰ্ষ দহটা বাতৰি

সন্ধিয়া 5 বজাৰ শীৰ্ষ দহটা বাতৰি

২০২১ ৰ বিধানসভা নিৰ্বাচনৰ বাবে ৰাজ্যিক সভাপতি ৰঞ্জিৎ দাসে ৰাজ্যিক কাৰ্যনিৰ্বাহক সদস্যৰ ৭৪ জনীয়া তালিকাত অনুমোদন জনাইছে । ইতিমধ্যে সদ্য প্ৰকাশিত এই ৭৪ জনীয়া তালিকাক লৈ দলটোৰ আভ্যন্তৰত চৰ্চাৰ বিষয় হৈ পৰিছে ।

যাত্ৰীৰ বাবে আছে এটা সু-খবৰ ৷ সোমবাৰে মুকলি হ’ব প্ৰত্যাশিত ৰোপৱে ৷ মন্ত্ৰী হিমন্ত বিশ্ব শৰ্মা আৰু মন্ত্ৰী সিদ্ধাৰ্থ ভট্টাচাৰ্যই আনুষ্ঠানিকভাৱে মুকলি কৰিব এই ৰোপৱে ৷ ৰোপৱেৰ পৰিচালনাৰ দায়িত্বত থকা বিষয়াগৰাকীয়ে সদৰী কৰিলে এই কথা ৷

দুৰ্গোৎসৱলৈ মাজত মাথো কেইটামান দিন বাকী ৷ দুৰ্গোৎসৱৰ পূৰ্বে প্ৰতিবাৰে এই সময়ত ব্যস্ততা বাঢ়ে মৃৎ শিল্পীসকলৰ ৷ শিল্পীসকল ব্যস্ত হৈ পৰে দেৱ-দেৱীৰ মৃণ্ময় মূৰ্তি বনোৱাত ৷ কিন্তু এইবছৰ কৰ'ণাৰ আতংকৰ বাবে বহু পৰিমাণে প্ৰভাৱিত হৈছে শিল্পীসকল ।

বায়'ফ্লক পদ্ধতিৰে মীন পালন কৰি স্বাৱলম্বী হ'বলৈ সক্ষম হৈছে অসমৰ এগৰাকী যুৱকে ৷ উচ্চ শিক্ষিত হৈয়ো চৰকাৰী চাকৰিলৈ বাট নাচাই নিজ কষ্ট আৰু ধৈৰ্যৰ ফলত সফলতাৰ শীৰ্ষত বগাবলৈ সক্ষম হোৱা ধৈৰ্য কোঁৱৰ বৰ্তমান অঞ্চলটোৰ নিবনুৱাৰ বাবে আদৰ্শ হৈ পৰিছে ৷

এটুপি বিশুদ্ধ খোৱা পানীৰ বাবে হাহাকাৰ কৰিবলগীয়া হৈছে গহপুৰ মহকুমাৰ নলনীবাৰী, কেকুৰীজান, তিনিকোণীয়া আদি কেইবাখনো গাঁৱৰ ৰাইজে ৷ বিশুদ্ধ খোৱাপানীৰ অভাৱত আইৰণযুক্ত পানী সেৱন কৰি ৰাইজ বিভিন্ন চৰ্মৰোগৰ লগতে বিভিন্ন ৰোগত ভূগিবলগীয়া হৈছে ৷

কৰ’ণা ভাইৰাছৰ সংক্ৰমণৰ বাবে মথুৰা জিলা কাৰাগাৰৰ প্ৰায় 500 গৰাকী কাৰাবন্দীক কৰা হৈছে কোৱাৰেণ্টাইন ৷ বিগত সময়ছোৱাত কাৰাগাৰখনৰ 24 গৰাকী কাৰাবন্দীৰ দেহত ধৰা পৰিছিল কোভিড 19 ৰ উপস্থিতি ৷ তদুপৰি ঝান্সীৰ কাৰাগাৰত 128 গৰাকী আৰু বলিয়া কাৰাগাৰত 228 গৰাকী কাৰাবন্দীৰ দেহত ধৰা পৰিছিল কোভিড 19 ৰ উপস্থিতি ৷

টীয়কৰ জাঁজীমুখ হাতীশালৰ ৰামা চাপৰিত দুমাহে আৱদ্ধ এটা বনৰীয়া হাতীৰ পোৱালী ৷ বনৰীয়া হাতীৰ পোৱালীটোত স্থানীয় ৰাইজে খাদ্য যোগান ধৰি আহিছে যদিও এতিয়ালৈ এজনো বন বিভাগৰ লোক উপস্থিত হোৱা নাই ৷ ফলত হাতীটোৰ অৱস্থা সংকটজনক হোৱা পৰিলক্ষিত হৈছে ৷

বিগত তিনিবছৰে ঘৰ ভাড়া দিব নোৱাৰাত জলসম্পদ বিভাগৰ জোনাই উপ-সংমণ্ডল কাৰ্যালয়ৰ বিদ্যুৎ সংযোগ বিচ্ছিন্ন কৰাৰ লগতে মেৰামতি অভাৱত জৰাজীৰ্ণ আৰু ভগা-ছিগা ভাড়াঘৰত বহু সমস্যাৰ মাজেৰে বিভাগীয় কাম-কাজ সম্পন্ন কৰি আহিছে।তদুপৰি ভগা-ছিগা তথা জৰাজীৰ্ণ কাৰ্যালয় ঘৰটোত কোনো নিৰাপত্তা নোহোৱাৰ লগতে বিষয়া-কৰ্মচাৰী সকলে বহি কাম- কাজ চলাই নিবলৈও কোঠাৰ অভাৱ। কৰ্মচাৰীৰ অভিযোগ, সমগ্ৰ ঘটনাৰ সন্দৰ্ভত জোনাই উপসংমণ্ডল জলসম্পদ বিভাগে ভাড়াত চলি থকা কাৰ্যালয়ৰ ঘৰ ভাড়া বিচাৰি চৰকাৰক তিনি বছৰে বহুবাৰ পত্ৰ প্ৰেৰণ কৰাৰ পিছতো কোনো ফল নধৰিল।

কোকৰাঝাৰত ভয়ংকৰ ৰূপে বৃদ্ধি পাইছে কৰ'ণা ভাইৰাছ ৷ ইতিমধ্যে জিলাখনত ১২০০ জনৰো অধিক লোক কৰ'ণাত আক্ৰান্ত হৈছে বুলি জানিবলৈ পোৱা গৈছে ৷

শনিবাৰে প্ৰয়াত অভিনেতা সুশান্ত সিং ৰাজপুতৰ বান্দ্ৰাস্থিত বাসগৃহ পৰিদৰ্শন কৰে চিবিআইৰ এটি দলে ৷ তাৎপৰ্যপূৰ্ণ যে, সুশান্তৰ সৈতে একেটা অট্টালিকাতে থকা এগৰাকী মহিলাই সাংবাদিকৰে হোৱা বাৰ্তালাপত কয়, অভিনেতা গৰাকীৰ মৃত্যুৰ আগদিনা তাত কোনো ধৰণৰ পাৰ্টী হোৱা নাছিল ৷