গুৱাহাটী, ৫ ছেপ্তেম্বৰ : উত্তৰ-পূৱৰ দুৱাৰমুখ গুৱাহাটী মহানগৰীত বৃদ্ধি পাইছে চোৰৰ উপদ্ৰৱ ৷ যাৰ বাবে ৰাজপথত নিৰাপত্তাহীনতাত ভূগিবলগীয়া হৈছে মহানগৰবাসীয়ে । পিছে ঠায়ে ঠায়ে চোৰৰ বিৰুদ্ধে গুৱাহাটী আৰক্ষীয়ে অভিযান অব্যাহত ৰাখিছে ।
এই অভিযানৰ মাজতে গুৱাহাটী আৰক্ষীৰ জালত পৰিল ৩ টাকৈ গভাইত চোৰ । পাণবজাৰ আৰক্ষীয়ে অভিযান চলাই গ্ৰেপ্তাৰ কৰিবলৈ সক্ষম হয় ম'বাইল চোৰ কেইটাক । ধৃত চোৰকেইটা ক্ৰমে বৰপেটাৰ মমৰেছ আলী, মকিবুৰ ইছলাম আৰু ছাদেক আলী ৷
আৰক্ষী সূত্ৰই প্ৰকাশ কৰা মতে, শনিবাৰে পুৱা প্ৰায় ৯ মান বজাত গোপন সূত্ৰৰ তথ্যৰ ভিত্তিত লাখটকীয়াৰ পৰা ধৃত চোৰ তিনিটাক আটক কৰা হয় ।
তাৰ পাছতে চোৰকেইটাক লগত লৈ ভূতনাথত অভিযান চলাই ১০ টা চুৰি ম'বাইল ফোন আৰু এখন নকল নোট জব্দ কৰে আৰক্ষীয়ে । ধৃত চোৰ তিনিটাই নিজকে ফল-মূলৰ ব্যৱসায়ী বুলি চিনাকি দিয়া বুলি আৰক্ষীৰ সূত্ৰটোৱে প্ৰকাশ কৰে । ঘটনা সন্দৰ্ভত পাণবজাৰ আৰক্ষী থানাত ৪৬৩/২১ নম্বৰত এটা গোচৰ ৰুজু কৰি আৰক্ষীয়ে তদন্ত অব্যাহত ৰাখিছে ।
লগতে পঢ়ক : শিৱসাগৰত ডকাইতিৰ চেষ্টা : ডকাইত আটক
