গুৱাহাটী, ৪ ডিচেম্বৰ: ২০২৩ চনৰ আটাইতকৈ প্ৰত্যাশিত ছবিসমূহৰ ভিতৰত অন্যতম ছবি হৈছে বিকি কৌশল অভিনীত ছবি ‘ছেম বাহাদুৰ’ । এই ছবিখন ১ ডিচেম্বৰত ছবিগৃহত মুক্তি লাভ কৰিছে । ‘ছেম বাহাদুৰ’ দেশৰ প্ৰথমজন ফিল্ড মাৰ্শ্বাল ছেম মানেকশ্ব’ৰ বায়’পিক ছবি । মেঘনা গুলজাৰৰ পৰিচালনাত নিৰ্মিত এই ছবিখনত মুখ্য চৰিত্ৰত অভিনয় কৰিছে বিকি কৌশলে ।
‘ছেম বাহাদুৰ’ৰ ট্ৰেইলাৰ মুক্তি পোৱাৰ পিচৰে পৰা অনুৰাগীয়ে অতি আগ্ৰহেৰে অপেক্ষা কৰি আছিল ছবিখনৰ মুক্তিৰ বাবে ৷ ১ ডিচেম্বৰত ছবিগৃহত ছবিখন মুক্তিৰ লগে লগে ছবিখনে চুই গৈছে দৰ্শকৰ হৃদয় । সকলোৱে ছবিখনৰ আৰু বিকি কৌশলৰ অভিনয়ৰ প্ৰশংসা কৰিছে । ইফালে ছবিখনে বক্স অফিচতো ভাল ফলাফল দেখুৱাবলৈ সক্ষম হৈছে ৷
উল্লেখ্য যে, এই ছবিখনৰ সৈতে অসমৰো আছে সম্পৰ্ক ৷ এতিয়া হয়তো আপুনি ভাবিছে অসমৰ সৈতে ‘ছেম বাহাদুৰ’ৰ কি সম্পৰ্ক আছে ? বাৰু, সেয়া কোৱাৰ আগত উল্লেখ কৰিব লাগিব যে শেহতীয়াকৈ ব্লকবাষ্টাৰ ছবি পাঠান আৰু জৱান মুক্তি পাইছিল ৷ এই দুয়োখন ছবিতে উজলি উঠিছিল দুগৰাকী অসম সন্তান ৷ পাঠান ছবিখনত দিগন্ত হাজৰিকা আৰু জৱান ছবিখনত কেনী বসুমতাৰী ৷ এতিয়া আকৌ এবাৰ বলীউডৰ ছবিত উজলি উঠিছে তিনিগৰাকী অসম সন্তান ৷
হয়, ‘ছেম বাহাদুৰ’ ছবিখনত তিনিগৰাকী আৰ্মী বিষয়াৰ চৰিত্ৰত অভিনয় কৰিছে অসমৰ তিনিগৰাকী অভিনেতাই । তিনি গৰাকী অভিনেতা ক্ৰমে- কেনী বসুমতাৰী, মনোজ বৰকটকী আৰু কৌশিক ভৰদ্বাজ । বিকি কৌশলৰ সৈতে অভিনয় কৰাৰ সুবিধা লাভ কৰাৰ বাবে উৎফুল্লিত কেনী বসুমতাৰী, মনোজ বৰকটকী আৰু কৌশিক ভৰদ্বাজ । ইতিমধ্যে অভিনেতা তিনিগৰাকীয়ে নিজাববীয়াকৈ সামাজিক মাধ্যম যোগে সুখানুভূতি প্ৰকাশ কৰা পৰিলক্ষিত হৈছে । লগতে অসমত "ছেম বাহাদুৰ" উপভোগ কৰা দৰ্শক সকলেও ছবিখনত উক্ত তিনিওগৰাকী অভিনেতাক দেখিবলৈ পাই গৌৰৱ অনুভৱ কৰিছে ।
