গুৱাহাটী, ১৭ ছেপ্টেম্বৰ: ৰাজ্য চৰকাৰৰ গাফিলতিৰ বাবেই কম্পিউটাৰ শিক্ষাৰ লগত জড়িত ৰাজ্যৰ সহস্ৰাধিক শিক্ষকৰ জীৱনলৈ নামি আহিছে ভাবুকি ৷ উল্লেখ্য যে ৰাজ্যত কম্পিউটাৰ শিক্ষাৰ নেতৃত্ব দি অহা কম্পিউটাৰ শিক্ষকসকলৰ চাকৰিৰ চুক্তিৰ ম্যাদ ইতিমধ্যে সমাপ্ত হৈছে ৷ ১০ ছেপ্টেম্বৰতে এইসকল ঠিকাভিত্তিক শিক্ষকৰ চুক্তিৰ ম্যাদ শেষ হৈছে যদিও এই পর্যন্ত অসম চৰকাৰৰ শিক্ষা বিভাগে চুক্তিৰ নৱীকৰণৰ কোনো ব্যৱস্থা কৰা নাই ৷ যাৰ ফলত এতিয়া ১,৩৪০ গৰাকী কম্পিউটাৰ শিক্ষকৰ মাজত হাহাকাৰ অৱস্থাৰ সৃষ্টি হৈছে ৷
এক কথাত আজিৰ তাৰিখত এই শিক্ষকসকল কৰ্মহীন ৷ যাক লৈ এই কম্পিউটাৰ শিক্ষকসকল উদ্বিগ্ন হৈ পৰিছে ৷ চৰকাৰৰ গুৰুত্বহীনতাৰ বাবে তেওঁলোকৰ বৃত্তিগত জীৱনৰ প্ৰতি ভাবুকি আহি পৰিছে ৷ এক অনিশ্চয়তাৰ মাজত জীৱন অতিবাহিত কৰিবলগা হৈছে এইসকল কম্পিউটাৰ শিক্ষকে ৷ লক্ষণীয় বিষয় যে অসম চৰকাৰে সকলো কাম-কাজ ডিজিটেলি কৰাৰ বাবে বিশেষ উদ্যোগ গ্ৰহণ কৰিছে ৷ কিন্তু বাস্তৱায়িত কৰাৰ বাবে প্ৰয়োজনীয় আন্তঃগাঁঠনি নিৰ্মাণত গুৰুত্ব দিয়া নাই ৷ যাৰ অন্যতম উদাহৰণ কম্পিউটাৰ শিক্ষকসকলৰ প্ৰতি চৰকাৰখনৰ অবহেলিত মনোভাৱ ৷
ৰাজ্যত কম্পিউটাৰ শিক্ষাক আগুৱাই নিয়াৰ ক্ষেত্রত বিশেষ ভূমিকা পালন কৰা এইসকল কম্পিউটাৰ শিক্ষকৰ প্ৰতি কৰা অবজ্ঞা-বঞ্চনাক লৈ ৰাজ্যজুৰি ব্যাপক ক্ষোভ আৰু প্রতিক্ৰিয়াৰ সৃষ্টি হৈছে ৷ উল্লেখ্য যে কম্পিউটাৰ শিক্ষকসকলে চাকৰি নিয়মীয়াকৰণ কৰা, ৬০ বছৰলৈ চাকৰি সুৰক্ষিত কৰা, দৰমহা বৃদ্ধি কৰা আদি দাবী উত্থাপন কৰি আহিছে যদিও চৰকাৰে কোনো গুৰুত্ব প্ৰদান কৰা নাই ৷ ইয়াৰ মাজতে ১০ ছেপ্টেম্বৰত চুক্তিৰ ম্যাদ উকলি গ'ল যদিও চৰকাৰে ম্যাদ বৃদ্ধি কৰা নাই ৷ যাৰ ফলত এতিয়া দিকবিদিক হেৰুৱাইছে এইসকল কম্পিউটাৰ শিক্ষকে ৷
লক্ষণীয় বিষয় যে ২০০৪ চনতে ৰাজ্য চৰকাৰে 'ৰাজীৱ গান্ধী কম্পিউটাৰ সাক্ষৰতা অভিযান' নামেৰে এক আঁচনি প্রাদেশীকৃত উচ্চ মাধ্যমিক আৰু উচ্চতৰ মাধ্যমিক বিদ্যালয়সমূহত ৰূপায়ণ কৰিছিল ৷ এই অভিযানৰ অধীনত ছাত্র-ছাত্রীসকলে শিক্ষানুষ্ঠানত বিনামূলীয়া কম্পিউটাৰ শিক্ষা লাভ কৰিবলৈ সক্ষম হয় ৷ ২০১৮ চনত আঁচনিখনৰ নাম সলনি কৰি ড° বাণীকান্ত কাকতি কম্পিউটাৰ সাক্ষৰতা আঁচনি নাম দিয়া হয় ৷ উল্লেখ্য যে পৰৱৰ্তী পৰ্যায়ত এই আঁচনিৰ অধীনত মাধ্যমিক শিক্ষা সঞ্চালকালয়ৰ অধীনত বিজ্ঞাপন প্ৰকাশ কৰি ১,৩৪৬ জনক শিক্ষানুষ্ঠানসমূহত কম্পিউটাৰ শিক্ষক হিচাপে নিযুক্তি দিয়া হয় ৷ তেতিয়াৰ পৰা শিক্ষানুষ্ঠানসমূহত এইসকল শিক্ষকে কম্পিউটাৰ শিক্ষা প্ৰদান কৰি আহিছে ৷
এই শিক্ষকসকলে পাঠদানৰ উপৰিও বিদ্যালয়ৰ কম্পিউটাৰ সম্পৰ্কীয় কাম, নৱম শ্ৰেণীৰ শিক্ষাৰ্থীৰ অনলাইন পঞ্জীয়ন, দশম শ্রেণীৰ অনলাইন আবেদন পত্র পূৰণ, শিক্ষকৰ বিল, ছাত্ৰ-ছাত্ৰীৰ জলপানি সম্পর্কীয় কাম, শিক্ষা সেতু, ইউ ডাইছ, মেট্ৰিকৰ উত্তৰ বহী মূল্যায়ন আদি বহু দায়িত্ব পালন কৰি আহিছে ৷ কিন্তু তথাপিও তেওঁলোক প্ৰাপ্যৰ পৰা বঞ্চিত হ'ব লগা হৈছে ৷ ২০১৭ চনৰ ২৮ ফেব্ৰুৱাৰীত কম্পিউটাৰ শিক্ষকৰ চাকৰি নিয়মীয়াকৰণ কৰাৰ কেবিনেটত সিদ্ধান্ত লোৱা হৈছিল ৷
কিন্তু সেই সিদ্ধান্ত আজিলৈকে কার্যকৰী নহ'ল ৷ আনহাতে ২০২২ চনৰ শেষৰ ফালে চৰকাৰৰ নিৰ্দেশমৰ্মে শিক্ষা বিভাগে চাকৰিৰ কার্যকাল ৬০ বছৰলৈ বৃদ্ধিৰ এক ফাইল প্রস্তুত কৰিছিল ৷ কিন্তু অজ্ঞাত কাৰণত এই ফাইলৰ কামো আগনাবাঢ়িল ৷ সমস্যাৰ মাজত থকা এই শিক্ষকসকলৰ এতিয়া চাকৰিটোক লৈয়ে শংকাৰ সৃষ্টি হৈছে ৷ চাকৰি নিয়মীয়া হোৱাটো দূৰৈৰে কথা, এতিয়া ঠিকাভিত্তিক চাকৰিটোও হেৰুওৱাৰ উপক্ৰম হৈছে ৷
লগতে পঢ়ক: Amrit Brikhshya Andolan: 1 কোটি গছপুলি ৰোপনৰ লক্ষ্যৰে আজিৰে পৰা ৰাজ্যত ‘‘অমৃত বৃক্ষ আন্দোলন’’
