গুৱাহাটী, 8 ডিচেম্বৰ : বিশ্ব গৌৰৱ গড়কে আদি কৰি অসমৰ বন্য প্ৰাণীসমূহক নিৰাপত্তা প্ৰদান কৰিবলৈ ৰাজ্য চৰকাৰে লোৱা পদক্ষেপক প্ৰশংসা কৰিছে উচ্চতম ন্যায়ালয়ৰ মুখ্য ন্যায়ধীশ শৰদ অৰবিন্দ ববডে । অসমৰ বন-বিষয়াসকলক পদবী অনুযায়ী মাৰণাস্ত্ৰ প্ৰদান কৰা হৈছে আৰু যাৱতীয় প্ৰশিক্ষণ দিয়া হৈছে । যাৰ ফলত চোৰাং চিকাৰী অসমৰ বনাঞ্চলত প্ৰৱেশ কৰিবলৈ সাহস নকৰে বুলি মন্তব্য কৰে মুখ্য ন্যায়াধীশ গৰাকীয়ে ।
আনহাতে, তেওঁ মহাৰাষ্ট্ৰ চৰকাৰকো অনুৰূপ পদক্ষেপ লোৱাৰ কাৰণে উচ্চ প্ৰশংসা কৰি দেশৰ আন ৰাজ্যতো অসম তথা মহাৰাষ্ট্ৰৰ আৰ্হিৰে মডেল প্ৰৱৰ্তন কৰাৰ পোষকতা কৰে । উল্লেখ্য যে, শুকুৰবাৰে উচ্চতম ন্যায়ালয়ত দেশৰ মুখ্য ন্যায়ধীশ শৰদ অৰবিন্দ ববডেৰ নেতৃত্বত গঠিত এখন তিনিজনীয়া বিচাৰপীঠে ৰাজস্থানৰ বনকর্মী জড়িত হৈ থকা এক গোচৰৰ শুনানী গ্রহণ কৰি এই মন্তব্য প্ৰদান কৰে ।
উচ্চতম ন্যায়ালয়ে বনকর্মী তথা বিষয়াসকলক মাৰণাস্ত্ৰ আৰু বুলেট প্ৰুফ জেকেট প্রদানৰো পোষকতা কৰে আৰু এই সন্দৰ্ভত কেন্দ্ৰ আৰু ৰাজ্যসমূহৰ পৰা উত্তৰ বিচাৰে মুখ্য ন্যায়ধীশ গৰাকীয়ে ।
লগতে পঢ়ক : গুৱাহাটী উচ্চ ন্যায়ালয়ৰ পৰৱৰ্তী মুখ্য ন্যায়াধীশ সুধাংশু ঢুলীয়া
