গুৱাহাটী, 23 মে’: অব্যাহত আছে দিহিং পাটকাই বনাঞ্চলৰ মুক্ত কয়লা খননৰ বিৰুদ্ধে ছাত্ৰ সমাজৰ আন্দোলন ৷ এইবাৰ গুৱাহাটী বিশ্ববিদ্যালয়ৰ ইক' ক্লাৱে হাতত লৈছে আন এক অনলাইন প্ৰতিবাদী কাৰ্যসূচীৰ। দেওবাৰে টুইটাৰযোগে অভিযান আৰম্ভ কৰিব বিশ্ববিদ্যালয় ছাত্ৰসমাজে ।
উল্লেখ্য যে, গুৱাহাটী বিশ্ববিদ্যালয়ৰ সৈতে এই অভিযানত সহযোগিতা আগবঢ়াব তেজপুৰ বিশ্ববিদ্যালয়, ডিব্ৰুগড় বিশ্ববিদ্যালয়, কটন বিশ্ববিদ্যালয় আৰু ভট্টদেৱ বিশ্ববিদ্যালয়ৰ ছাত্ৰসমাজে । 24 তাৰিখে সন্ধিয়া 7 বজাত আটাইকেইখন বিশ্ববিদ্যালয়ৰ ছাত্ৰসমাজে একেসময়তে টুইটাৰত #SaveDehingPatkai লিখি প্ৰতিবাদ সাব্যস্ত কৰিব বুলি জানিবলৈ দিয়ে ।
মুলতঃ সামাজিক মাধ্যমৰ জৰিয়তে কেন্দ্ৰীয় চৰকাৰক মুক্ত কয়লা খননৰ অনুমতি বাতিল কৰাৰ দাবীৰে এই অভিনৱ প্ৰতিবাদী কাৰ্যসূচী হাতত লৈছে গুৱাহাটী বিশ্ববিদ্যালয়ৰ ইক' ক্লাৱে। কাৰ্যসূচীত সকলো প্ৰকৃতিপ্ৰেমীৰে সহায় বিচাৰিছে ছাত্ৰসমাজে ৷
উল্লেখযোগ্য যে, দিহিঙৰ বুকুত কয়লা খননৰ অনুমতি বাতিলৰ দাবীৰে ইতিমধ্যে প্ৰধানমন্ত্ৰী নৰেন্দ্ৰ মোডীলৈ পত্ৰ প্ৰেৰণ কৰিছে গুৱাহাটী বিশ্ববিদ্যালয়ৰ ইক' ক্লাৱে।
লগতে পঢ়ক: অসম গৌৰৱ নৱ কুমাৰ ফুকনৰ এভাৰেষ্ট আৰোহণৰ চতুৰ্থ বৰ্ষপূৰ্তি পালন